خیبرپختونخوا: نوشہرہ میں قبائلی رہنما کے گھر پر دستی بموں سے حملہ، 5 افراد زخمی

نوشہرہ (نمائندہ ڈیلی اردو) پاکستان کے شورش زدہ صوبے خیبرپختونخوا کے ضلع نوشہرہ کے علاقے اکبرپورہ میں نامعلوم دہشت گردوں نے ایک قبائلی رہنما کے گھر پر دستی بموں سے حملہ کیا جس کے نتیجے میں 5 افراد زخمی ہوگئے۔

پولیس کے مطابق زخمیوں میں تین مرد، ایک خاتون اور ایک بچی شامل ہیں، جنہیں ابتدائی طبی امداد کے بعد پبی ہسپتال سے لیڈی ریڈنگ ہسپتال پشاور منتقل کردیا گیا ہے۔

ذرائع کا کہنا ہے کہ دہشت گردوں نے تورا بورا کے علاقے میں  قبائلی رہنما سردار علی کے گھر پر دو دستی بم پھینکے، جن میں سے ایک پھٹ نہیں سکا۔ دھماکے کے باعث گھر کو جزوی نقصان پہنچا جبکہ پورے علاقے میں خوف و ہراس پھیل گیا۔

پولیس کا کہنا ہے کہ سردار علی کی کسی سے ذاتی دشمنی نہیں تھی۔ حملے میں سردار علی، ان کی اہلیہ اور بچہ بھی زخمیوں میں شامل ہیں۔

پولیس نے واقعے کی تحقیقات شروع کردی گئی ہیں۔