خیبر: وادی تیراہ میں خودکش حملہ، 2 اہلکار ہلاک،11 زخمی، اتحاد المجاہدین نے ذمہ داری قبول کرلی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع خیبر کے دور افتادہ علاقے وادیٔ تیراہ میں فوجی بریگیڈ ہیڈکوارٹر پر دہشت گردوں کے خودکش گاڑی حملے میں دو اہلکار ہلاک جبکہ 11 زخمی ہوگئے۔

تفصیلات کے مطابق بارودی مواد سے بھری گاڑی کو 26 ایف ایف کے پڑاک بنگلہ بٹالین ہیڈکوارٹر کے مرکزی دروازے سے ٹکرا کر دھماکہ کیا گیا، جس کے بعد دہشت گردوں نے چھوٹے اور بڑے ہتھیاروں سے فائرنگ کی۔ سیکیورٹی فورسز نے بھرپور جوابی کارروائی کی۔

دھماکے اور فائرنگ کے نتیجے میں حوالدار آرشد (26 ایف ایف) سمیت دو اہلکار ہلاک ہوگئے۔ زخمیوں میں لانس نائیک حیات، سپاہی اویس (شدید زخمی)، سپاہی عابد، سپاہی نعمان، حوالدار شبیر، حوالدار شاد اللہ، لانس نائیک عاصم، سپاہی ساجد، سپاہی ریاض، نائیک امجد (SOC-6)، سپاہی نذیر اور سپاہی ثاقب شامل ہیں۔

زخمی اہلکاروں کو فوری طور پر لرباغ ایف ٹی سی ہسپتال منتقل کر دیا گیا ہے، جہاں بعض کی حالت تشویشناک بتائی جاتی ہے، جس سے ہلاکتوں میں اضافے کا خدشہ ہے۔

حملے کے بعد علاقے کو گھیرے میں لے کر سرچ آپریشن شروع کر دیا گیا۔

کالعدم تنظیم اتحاد المجاہدین پاکستان نے حملے کی ذمہ داری قبول کرتے ہوئے بمبار کی شناخت قاری عمر آفریدی کے نام سے کی۔ ترجمان محمود الحسن نے دعویٰ کیا کہ خودکش حملے میں 31 اہلکار ہلاک اور 23 زخمی ہوئے ہیں، تاہم یہ دعویٰ آزاد ذرائع سے تصدیق شدہ نہیں۔

اسی دوران کالعدم لشکرِ اسلام سے منسلک متعدد خفیہ اکاؤنٹس نے بھی اس حملے کو تنظیم کے مقتول رہنما منگل باغ کی ہلاکت کا بدلہ قرار دیا ہے۔