خیبر: وادی تیراہ میں قومی شوریٰ کا فیصلہ: فحش ویڈیوز اسکینڈل پر چار گھر نذرِ آتش

خیبر (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع خیبر کی دور افتادہ وادی تیراہ میں قبیلہ برقمبرخیل کے قومی مشران نے غیرت کے نام پر مبینہ فحاشی کے خلاف کارروائی کرتے ہوئے چار گھروں کو آگ لگا دی۔

تفصیلات کے مطابق تقریباً دو ماہ قبل برقمبرخیل حیدر کنڈاؤ کاریگر کلے میں دو نوجوان لڑکوں اور دو لڑکیوں کی مبینہ غیر اخلاقی ویڈیوز اور آڈیوز سوشل میڈیا پر وائرل ہوئیں۔ واقعہ منظرِ عام پر آنے کے بعد قبیلے کی قومی شوریٰ نے اسے روایات کے منافی قرار دے کر سخت سزا تجویز کی۔

شوریٰ کے رہنماؤں حاجی ظاہر شاہ آفریدی اور کمال الدین کے مطابق گھروں کو جلانے کا فیصلہ کسی قانونی یا شرعی ضابطے کے تحت نہیں بلکہ آفریدی قبائل کی صدیوں پرانی روایات کی روشنی میں کیا گیا۔ ان کا کہنا تھا کہ علاقے کی بدنامی اور بے حیائی پھیلانے والوں کے لیے یہی سزا مقرر کی گئی ہے اور یہ فیصلہ متفقہ طور پر کیا گیا۔

مقامی ذرائع کا کہنا ہے کہ ویڈیوز منظر عام پر آنے کے بعد دونوں نوجوان لڑکے علاقے سے لاپتہ ہیں اور خدشہ ہے کہ انہیں بھی کسی وقت قتل کیا جا سکتا ہے۔

ادھر برقمبرخیل قومی شوریٰ کے فیصلے کو بعض سیاسی و سماجی حلقوں اور دیگر قبائلی مشران نے سراہتے ہوئے اسے آفریدی روایات کے مطابق قرار دیا۔

مزید برآں، قمبرخیل شوریٰ نے اعلان کیا ہے کہ علاقے میں منشیات خصوصاً ’’آئس‘‘ کی خرید و فروخت اور میڈیکل اسٹوروں میں دستیاب نشہ آور ادویات کے خلاف سخت کارروائی کی جائے گی۔ 

شوریٰ نے خبردار کیا کہ کمسن بچوں کے استحصال اور غیر اخلاقی سرگرمیوں کو کسی صورت برداشت نہیں کیا جائے گا اور قومی روایات کے مطابق ایسے عناصر کے خلاف سخت اقدامات کیے جائیں گے۔