خیبر: پاکستانی طالبان نے مذاکرات میں حکومت سے دو بڑے مطالبات رکھ دیے

پشاور + باڑہ + وادی تیراہ (نمائندگان ڈیلی اردو) پاکستان کے شورش زدہ صوبے خیبر پختونخوا کے  قبائلی ضلع خیبر کی دور افتادہ وادی تیراہ میں میدان میں تحریک طالبان پاکستان اور مقامی مذاکراتی جرگے کے درمیان ایک اہم ملاقات ہوئی، جس میں امن و مفاہمت کے امکانات پر تبادلہ خیال کیا گیا۔ 

ملاقات میں سو رکنی مذاکراتی جرگے نے حصہ لیا، جس میں باڑہ سیاسی اتحاد کے رہنماؤں کے علاوہ جمرود، لنڈی کوتل،باڑہ اور تیراہ میدان کے قومی و علاقائی مشران اور سابق اراکین صوبائی اسمبلی شامل تھے۔

جرگے کی جانب سے باڑہ کی نمائندگی ہاشم خان آفریدی، شاہ فیصل، خان ولی آفریدی، حاجی شیرین اور عطا اللہ اصغر خان نے کی، جبکہ جمرود اور لنڈی کوتل سے ملک صلاح الدین، ملک عبدالرازق، مفتی اعجاز شفیق شیر اور ملک اسرار نے شرکت کی۔ 

تیراہ میدان کی نمائندگی مولانا حضرت خان، مولانا عزت اللہ ہمخیال، برقمبر خیل قومی تڑون کے سربراہ ظاہر شاہ آفریدی، کمال الدین اور ملک آدم خان نے کی۔

پاکستانی طالبان کی جانب سے غازی عبداللہ، ابوذر آفریدی اور دیگر اہم کمانڈرز مذاکرات میں شریک تھے۔ تقریباً ایک گھنٹے تک جاری رہنے والی اس ملاقات میں تحریک طالبان پاکستان نے جرگے کے سامنے دو بنیادی مطالبات پیش کیے۔

پہلا مطالبہ شرعی نظام کے نفاذ سے متعلق تھا، جس میں تحریک طالبان نے اپنی دہائیوں پر محیط جدوجہد اور ہزاروں کارکنوں کی قربانیوں کا ذکر کیا۔ طالبان نے کہا کہ افغانستان میں قائم موجودہ اسلامی حکومت میں پاکستانی مجاہدین کا اہم کردار شامل ہے۔

دوسرا مطالبہ فاٹا کے انضمام سے قبل کے دور کے انتظامی طریقہ کار کی بحالی سے متعلق تھا، جس میں طالبان کی تنظیمیں قبائلی علاقوں میں آزادانہ کام کر سکتی تھیں۔ طالبان قیادت کا کہنا تھا کہ وہ چاہتے ہیں کہ پورے ملک میں اسلامی و شرعی نظام نافذ ہو۔

ذرائع کے مطابق مذاکراتی جرگے نے فیصلہ کیا کہ تحریک طالبان کے مطالبات کو جلد حکومت پاکستان کے سامنے پیش کیا جائے گا۔ یہ مذاکرات اس وقت اہمیت اختیار کر گئے ہیں کہ جاری فائر بندی کی مدت آج رات ختم ہو رہی ہے، جس سے علاقائی امن و سلامتی کے حوالے سے خدشات بڑھ گئے ہیں۔

مذاکرات مکمل ہونے کے بعد پچاس رکنی جرگہ واپس پشاور روانہ ہو گیا۔