خیبر پختونخوا: ایف سی اہلکار اغواء، پولیس اہلکار کے گھر پر حملہ اور شمالی وزیرستان میں اسسٹنٹ کمشنر یرغمال

پشاور( ڈیلی اردو) پاکستان کے شورش زدہ صوبے خیبر پختونخوا میں امن و امان کی صورتحال مزید تشویشناک ہو گئی ہے جہاں تین مختلف واقعات میں فرنٹیئر کانسٹیبلری کے اہلکار اغواء، پولیس اہلکار کے گھر پر دہشت گردوں کا حملہ اور شمالی وزیرستان میں ایڈیشنل اسسٹنٹ کمشنر کی گاڑی پر مسلح افراد کا حملہ سامنے آیا ہے۔

ٹانک کے تھانہ گومل کی حدود کوٹ نواز سے ضیاء اللہ نامی فرنٹیئر کانسٹیبلری اہلکار کو اغواء کیا گیا، جو کہ 15 دن کی چھٹی پر گھر آیا تھا۔ اغواء اس وقت ہوا جب وہ اپنے چھوٹے بھائی کے ساتھ موٹر سائیکل پر بازار سے واپس آ رہا تھا۔ دو مسلح افراد نے راستے میں اسے اغواء کر لیا۔

ادھر ضلع لکی مروت کے علاقے شیری خیل میں دہشت گردوں نے ہیڈ کانسٹیبل عصمت اللہ کے گھر پر دھاوا بولتے ہوئے اہل خانہ کو یرغمال بنا لیا اور مکان کے ساتھ ساتھ موٹر کار کو آگ لگا دی۔ واقعے میں جانی نقصان تو نہیں ہوا، مگر دہشت گرد تین رائفلیں، ایک شاٹ گن اور ایک موٹر سائیکل لے کر فرار ہو گئے۔

اسی طرح شمالی وزیرستان کے تحصیل میرعلی میں مسلح افراد نے ایڈیشنل اسسٹنٹ کمشنر رزمک محمد یونس یوسفزی کی گاڑی پر حملہ کر کے انہیں اور ان کے عملے کو دو گھنٹے تک یرغمال بنائے رکھا۔ حملہ آوروں نے ایڈیشنل اسسٹنٹ کمشنر کی گاڑی، بندوق اور پستول بھی اپنے قبضے میں لے لیے۔