خیبر کی وادی تیراہ میں کواڈ کاپٹر حملہ، خاتون سمیت تین بچے زخمی

واشنگٹن (ش ح ط) صوبہ خیبرپختونخوا کے قبائلی ضلع خیبر کی دور افتادہ وادی تیراہ کے علاقے شلوبر لیونے چینہ میں کواڈ کاپٹر کے ذریعے کیے گئے ایک مبینہ حملے میں ایک خاتون اور تین بچے زخمی ہو گئے۔

مقامی ذرائع اور حکام کے مطابق یہ واقعہ اتوار کی شب پیش آیا، جب نامعلوم سمت سے ایک کواڈ کاپٹر کے ذریعے ایک رہائشی گھر کو نشانہ بنایا گیا۔ حملے کے نتیجے میں ایک خاتون اور تین بچے زخمی ہو گئے، جنہیں فوری طور پر قریبی طبی مرکز منتقل کر دیا گیا۔

ذرائع کے مطابق زخمیوں کی حالت خطرے سے باہر بتائی جا رہی ہے، تاہم ایک بچے کو تشویشناک حالت میں پشاور منتقل کیے جانے کی اطلاعات بھی موصول ہوئی ہیں۔

تاحال حملے کی نوعیت، کواڈ کاپٹر کی شناخت اور ذمہ داری سے متعلق کوئی سرکاری بیان جاری نہیں کیا گیا۔ نہ ہی یہ واضح ہو سکا ہے کہ حملہ کس گروہ یا پاکستانی سیکورٹی فورسز کی جانب سے کیا گیا۔

یاد رہے کہ وادی تیراہ ماضی میں شدت پسندی، سیکیورٹی آپریشنز اور سرحد پار دراندازی کے باعث ایک حساس علاقہ رہا ہے۔ حالیہ واقعہ علاقے میں سیکیورٹی صورت حال پر ایک بار پھر سوالیہ نشان کھڑا کر رہا ہے۔

قبل ازیں 27 مئی کو جنوبی وزیرستان لوئر کی تحصیل برمل کے علاقے اعظم ورسک میں ایک والی بال گراؤنڈ پر مبینہ طور پر پاکستانی فوج کے کواڈ کاپٹر کے ذریعے بم گرایا گیا تھا، جس کے نتیجے میں کم از کم 22 مقامی شہری زخمی ہوئے تھے۔ زخمیوں میں نوعمر بچے، نوجوان اور بزرگ شامل تھے۔

اسی طرح 19 مئی کو شمالی وزیرستان کے علاقے میر علی کے گاؤں ہرمز میں بھی ایک مبینہ ڈرون حملے میں ایک ہی خاندان کے چار بچے ہلاک اور پانچ افراد زخمی ہوئے تھے، جن میں ایک خاتون بھی شامل تھیں۔ اس واقعے کے خلاف مقامی افراد نے احتجاجاً دھرنا دیا تھا۔ تاہم ایک ہفتے کے بعد مظاہرین نے مقامی انتظامیہ کے ساتھ معاہدے کے بعد احتجاج ختم کرنے کا اعلان کر دیا تھا۔