دوبارہ جارحیت کی صورت میں انڈیا کو شدید جواب دیا جائیگا، فیلڈ مارشل عاصم منیر

ایبٹ آآباد (ڈیلی اردو) پاکستان کے فوجی چھاؤنی والے شہر ایبٹ آباد میں پاکستانی فیلڈ مارشل اور آرمی چیف جنرل عاصم منیر نے کہا ہے کہ دوبارہ جارحیت کی صورت میں انڈیا کو پہلے سے زیادہ شدت کے ساتھ جواب دیا جائے گا۔ 

اُنہوں نے کہا کہ آپریشن بنیان مرصوص سے قوم کا پاکستان فوج پر اعتماد مزید مضبوط ہوا اور پاکستان نے اپنی دفاعی اور عسکری صلاحیتوں کا لوہا منوایا۔

یہ بیان جنرل عاصم منیر نے ہفتے کو پاکستان ملٹری اکیڈمی (کاکول) میں پاسنگ آؤٹ پریڈ سے خطاب کے دوران دیا۔ انہوں نے کہا کہ “پاکستان نے معرکہ حق میں اپنی عسکری و دفاعی صلاحیتوں کا بھرپور مظاہرہ کیا اور قوم نے فوج کے ساتھ سیسہ پلائی دیوار کی طرح کھڑے رہ کر ہمارا حوصلہ بڑھایا۔”

جنرل عاصم منیر نے کہا کہ پاکستان کی سرزمین کا ایک انچ بھی کسی کو نہیں دیا جائے گا اور ملک کی دفاعی صلاحیتیں ہر وقت چوکنا اور تیار ہیں۔

 اُنہوں نے انڈیا کی جانب سے پاکستان پر لگائے جانے والے بے بنیاد الزامات کی بھی سختی سے مذمت کی۔

آرمی چیف نے اس بات پر زور دیا کہ جوہری ہتھیاروں کے حامل ماحول میں جنگ کسی مسئلے کا حل نہیں ہوتی، اس لیے دونوں ملکوں کو باہمی برابری کی بنیاد پر مذاکرات اور حل طلب تنازعات کے پرامن حل تلاش کرنے کی ضرورت ہے۔

انہوں نے پاک فوج کے افسران و جوانوں سے کہا کہ وہ ملک کی حفاظت کے لیے ہر صورت تیار رہیں اور قوم کے اعتماد کو قائم رکھنے کے لیے اپنی ذمہ داریوں کو بخوبی نبھائیں۔