دہشتگردوں کو پناہ نہ دیں، خیبرپختونخوا کو دہشتگردی سے پاک کریں گے: گورنر فیصل کریم کنڈی

چارسدہ (ڈیلی اردو) گورنر خیبرپختونخوا فیصل کریم کنڈی نے کہا ہے کہ صوبے سے دہشتگردی کے خاتمے کے لیے مؤثر کارروائیوں کے سوا کوئی راستہ نہیں، عوام دہشتگردوں کو اپنے درمیان پناہ نہ دیں اور ان سے خود کو الگ رکھیں۔ انہوں نے کہا کہ ملک کی سلامتی کے لیے پاک فوج، پولیس اور دیگر سکیورٹی اداروں نے بے شمار قربانیاں دی ہیں اور ان قربانیوں کو رائیگاں نہیں جانے دیا جائے گا۔

فیصل کریم کنڈی نے چارسدہ میں شہید ڈی ایس پی عمران الدین اور سپاہی کاظم جان کے گھروں کا دورہ کیا، جہاں انہوں نے اہل خانہ سے تعزیت اور ہمدردی کا اظہار کیا اور مرحومین کے ایصالِ ثواب کے لیے فاتحہ خوانی کی۔ اس موقع پر میڈیا سے گفتگو کرتے ہوئے انہوں نے کہا کہ سکیورٹی فورسز ملک کے دفاع اور امن کے قیام کے لیے قربانیاں دے رہی ہیں، جبکہ پوری قوم ان کے ساتھ کھڑی ہے۔

گورنر خیبرپختونخوا نے کہا کہ قومی ایپکس کمیٹی کے حالیہ اجلاس میں دہشتگردی کے خلاف زیرو ٹالرنس پالیسی پر زور دیا گیا ہے۔ ان کے مطابق صوبے کو دہشتگردی سے پاک کرنے کے لیے مربوط اقدامات ضروری ہیں۔ انہوں نے دعویٰ کیا کہ افغانستان سے بین الاقوامی افواج کے انخلا کے بعد وہاں چھوڑا گیا جدید اسلحہ دہشتگردوں کے ہاتھ لگا، جبکہ پاکستان اور افغانستان کے درمیان طویل سرحد کے باعث نگرانی کے حوالے سے مشکلات بھی پیش آتی ہیں۔

فیصل کریم کنڈی نے کہا کہ دہشتگردی کے خلاف کارروائیوں کے دوران شہریوں کو ممکنہ نقصان سے بچانے کے لیے تعاون ضروری ہے۔ انہوں نے عوام پر زور دیا کہ وہ دہشتگردوں کو پناہ نہ دیں اور سکیورٹی اداروں کے ساتھ تعاون کریں۔ ان کا کہنا تھا کہ پولیس کی استعداد بڑھانے کے لیے ترقیاتی فنڈز میں کٹوتی کرکے جدید اسلحہ فراہم کرنے پر غور کیا جائے گا۔ انہوں نے مزید کہا کہ وفاقی وزیر داخلہ محسن نقوی نے بھی پولیس کو درکار اسلحہ اور فنڈز کی فراہمی کے لیے تعاون کی یقین دہانی کرائی ہے۔

گورنر نے دعویٰ کیا کہ دہشتگردی کے خلاف جنگ کے لیے صوبے کو 800 ارب روپے فراہم کیے گئے، تاہم ان کے بقول یہ رقم مکمل طور پر خرچ نہیں کی جاسکی۔ انہوں نے ماضی کی صوبائی حکومت پر تنقید کرتے ہوئے کہا کہ دہشتگردی اور افغانستان سے متعلق معاملات پر واضح مؤقف اختیار کرنے کی ضرورت ہے۔ ان کا کہنا تھا کہ جو عناصر پاکستان اور آئین کو تسلیم نہیں کرتے، ان کے ساتھ مذاکرات یا رعایت کے معاملے پر سنجیدگی سے غور ہونا چاہیے۔

معدنی وسائل کے حوالے سے گفتگو کرتے ہوئے فیصل کریم کنڈی نے کہا کہ خیبرپختونخوا میں معدنی ذخائر سے فائدہ اٹھانے کے لیے سرمایہ کاری اور تکنیکی وسائل کی ضرورت ہے۔ ان کے مطابق معدنیات کی تلاش اور نکالنے کے منصوبوں میں پاکستانی کمپنیوں کو ترجیح دی جائے گی، جبکہ مقامی کمپنیوں کے پاس مطلوبہ صلاحیت نہ ہونے کی صورت میں غیر ملکی سرمایہ کاروں کو بھی مدعو کیا جاسکتا ہے۔ انہوں نے کہا کہ معدنی وسائل سے سب سے پہلے عوام کو فائدہ پہنچنا چاہیے، اس کے بعد صوبے اور دیگر فریقوں کا حق آتا ہے۔

گورنر خیبرپختونخوا نے کہا کہ امن و امان کی صورت حال بہتر ہونے کے بعد صوبے میں معدنیات اور سیاحت کے شعبوں کو ترقی دینے کے لیے اقدامات کیے جاسکتے ہیں۔ سہیل آفریدی سے متعلق سوال کے جواب میں انہوں نے کہا کہ وہ محفوظ ہاتھوں میں ہیں، تاہم ان کے مستقبل کے بارے میں فی الحال کچھ کہنا ممکن نہیں۔