رافیل طیاروں سے متعلق خبروں پر بھارتی ایئرمارشل کا ردعمل: ’جنگ میں نقصان حیرت کی بات نہیں‘

نئی دہلی (ڈیلی اردو ) بھارتی ایئر فورس کے اعلیٰ عہدیدار ایئرمارشل اے کے بھارتی نے ایک پریس کانفرنس کے دوران رافیل طیاروں سے متعلق خبروں پر گفتگو کرتے ہوئے کہا کہ جنگی صورتحال میں نقصان کوئی حیرت کی بات نہیں، یہ کسی بھی عسکری کارروائی کا ممکنہ حصہ ہوتا ہے۔

ایک صحافی کی جانب سے سوال کیا گیا کہ بین الاقوامی ذرائع ابلاغ میں رافیل طیاروں کے نقصان کی خبریں گردش کر رہی ہیں، کیا اس حوالے سے انڈین ایئر فورس کوئی تفصیلات فراہم کرے گی؟ اس پر ایئرمارشل اے کے بھارتی نے جواب دیا کہ وہ ان قیاس آرائیوں پر براہ راست تبصرہ نہیں کریں گے، کیونکہ اس وقت ملک حالتِ جنگ میں ہے اور کوئی بھی غیر محتاط بیان دشمن کو فائدہ پہنچا سکتا ہے۔

ایئرمارشل نے مزید کہا کہ اصل سوال یہ ہونا چاہیے کہ کیا ہماری فورسز نے اپنے عسکری اہداف حاصل کیے؟ اور اس کا جواب واضح طور پر ’ہاں‘ ہے۔ ہم نے دشمن کے متعدد ٹھکانوں کو کامیابی سے نشانہ بنایا اور اس آپریشن میں ہمارے تمام پائلٹ بحفاظت واپس آ چکے ہیں۔

ان کا کہنا تھا کہ عالمی سطح پر کارروائیوں کے اثرات واضح ہیں، اور بھارتی فضائیہ پوری پیشہ ورانہ مہارت کے ساتھ اپنے مشن سرانجام دے رہی ہے۔ نقصان کی تفصیلات فی الوقت ظاہر کرنا ملکی مفاد میں نہیں۔