رفح بارڈر فلسطینیوں کیلئے جزوی طور پر دوبارہ کھول دیا گیا

قاہرہ (ڈیلی اردو) مصر اور غزہ کے درمیان اہم رفح بارڈر پیر کے روز فلسطینیوں کے لیے جزوی طور پر دوبارہ کھول دیا گیا۔ 

مصری سرکاری ذرائع ابلاغ کے مطابق ابتدائی دنوں میں دونوں جانب سے صرف 50 افراد کو گزرنے کی اجازت دی جائے گی۔

ایک اسرائیلی اہلکار نے پیر کو بتایا کہ یورپی سرحدی معاونت مشن کی آمد کے بعد رفح بارڈر کو لوگوں کی آمد و رفت، داخلے اور اخراج کے لیے کھول دیا گیا ہے۔ یہ اقدام امدادی تنظیموں کی جانب سے کئی ماہ سے کی جانے والی اپیلوں کے بعد کیا گیا۔

تاہم اسرائیلی سرکاری نشریاتی ادارے کان کے مطابق پیر کے روز تقریباً 150 افراد، جن میں 50 فلسطینی مریض بھی شامل ہیں، غزہ سے مصر روانہ ہوں گے۔

دوسری جانب القاہرہ نیوز نے مصری وزارتِ صحت کے حوالے سے بتایا ہے کہ فلسطینی مریضوں کے استقبال کے لیے 150 اسپتال اور 300 ایمبولینسیں تیار کر لی گئی ہیں، جبکہ آنے والے فلسطینیوں کی مدد کے لیے 12 ہزار ڈاکٹروں اور 30 فوری رسپانس ٹیموں کو تعینات کیا گیا ہے۔

رفح بارڈر کو غزہ میں امداد داخل کرنے کا ایک اہم راستہ سمجھا جاتا ہے، جہاں 10 اکتوبر سے جنگ بندی کے باوجود انسانی حالات بدستور نہایت سنگین ہیں۔

واضح رہے کہ رفح بارڈر مئی 2024 میں حماس کے ساتھ جنگ کے دوران اسرائیلی افواج کے کنٹرول میں آنے کے بعد بند کر دیا گیا تھا، تاہم 2025 کے اوائل میں اسے مختصر اور محدود مدت کے لیے جزوی طور پر کھولا گیا تھا۔