روس اور یوکرین جنگ کے خاتمے کیلئے جلد مذاکرات شروع کریں گے، امریکی صدرٹرمپ

واشنگٹن (ڈیلی اردو) امریکہ کے صدر ڈونلڈ ٹرمپ نے کہا ہے کہ روس اور یوکرین جنگ کے خاتمے کے لیے جلد مذاکرات شروع کریں گے۔

ایکس پر ایک بیان میں امریکی صدر نے کہا کہ انھوں نے روسی صدر ولادیمیر پوتن کے ساتھ دو گھنٹے فون پر بات کی۔

انھوں نے کہا کہ ’مجھے یقین ہے کہ بات چیت اچھی رہی۔ روس اور یوکرین فوری طور پر جنگ بندی اور سب سے اہم جنگ کے خاتمے کے لیے مذاکرات شروع کریں گے۔‘

’اس کے لیے شرائط فریقین طے کریں گے۔ ایسا ہی ہونا چاہیے کیونکہ وہ مذاکرات کی تفصیلات جانتے ہیں جس کے بارے میں کسی اور کو علم نہیں ہوگا۔‘

ڈونلڈ ٹرمپ نے کہا ’جب یہ تباہ کن ’خونریزی‘ ختم ہوجائے گی تو روس امریکہ کے ساتھ بڑے پیمانے پر تجارت کرنا چاہتا ہے اور میں نے اس سے اتفاق کیا ہے۔ روس کے لیے بڑے پیمانے پر ملازمتیں اور دولت پیدا کرنے کا زبردست موقع ہے۔‘

اپنے تفصیلی بیان میں امریکی صدر نے مزید کہا کہ ’اسی طرح یوکرین اپنے ملک کی تعمیر نو کے عمل میں تجارت پر ایک بڑا فائدہ اٹھا سکتا ہے۔‘ امریکہ کے صدر نے دہرایا کہ ’روس اور یوکرین کے درمیان مذاکرات فوری طور پر شروع ہوں گے۔‘

’میں نے یوکرین کے صدر ولادیمیر زیلینسکی، یورپی کمیشن کی صدر ارسلا وان ڈیر لیئن، فرانس کے صدر ایمانوئل میخوان ، اٹلی کے وزیر اعظم جارجیا میلونی، جرمنی کے چانسلر فریڈرک مرز اور فن لینڈ کے صدر الیگزینڈر سٹب کو صدر پوتن سے فون پر بات چیت کے فوراً بعد مطلع کیا ہے۔‘

انھوں نے بتایا کہ ’ویٹیکن نے کہا ہے کہ وہ مذاکرات کی میزبانی کرے گا۔‘