روس کے زیرِ قبضہ یوکرینی علاقے میں بس پر ڈرون حملہ، 8 افراد ہلاک، 11 زخمی

ماسکو (ڈیلی اردو/بی بی سی) روس کے زیرِ کنٹرول یوکرین کے علاقے میں مسافر بس پر ہونے والے ایک ڈرون حملے میں آٹھ افراد ہلاک جبکہ 11 زخمی ہو گئے ہیں۔

یوکرین کے مشرقی علاقےڈونیٹسک میں کریملن کی حمایت سے تعینات رہنما ڈینس پوشیلین نے بتایا ہے کہ کہ یہ بس بدھ کی علی الصبح اس وقت نشانہ بنی جب وہ ماسکو اور روس کے زیرِ قبضہ کریمیا کے شہر سمفروپول کے درمیان موجود تھی۔

روسی حکام کے مطابق رات بھر میں 350 سے زیادہ ڈرونز کو مار گرایا گیا۔

یاد رہے کہ گزشتہ روز یوکرین کے مختلف شہروں پر روسی بڑے حملے میں کم از کم 22 افراد ہلاک ہو گئے تھے، جن میں متعدد خواتین اور بچے بھی شامل تھے۔

اس حملے کے اگلے ہی روز بس پر ڈرون حملہ کیا گیا ہے۔

اس علاقے کے گورنر الیگزینڈر دروزدینکو کے مطابق ماسکو کے شمال مغرب میں واقع لینن گراڈ کے علاقے کے اوپر کم از کم 50 ڈرونز کو مار گرایا گیا۔

یاد رہے کہ اسی علاقے میں سینٹ پیٹرزبرگ شہر بھی شامل ہے، جہاں بدھ سے سالانہ انٹرنیشنل اکنامک فورم کا انعقاد کیا جا رہا ہے، جس کا مقصد روس کو عالمی سطح پر پیش کرنا ہے۔

منتظمین کے مطابق اس فورم میں 130 سے زیادہ ممالک اور خطوں کے وفود شرکت کریں گے۔