زیارت : اسسٹنٹ کمشنر کے اسکواڈ پر حملہ، 11 دہشتگرد اور 8 اہلکار ہلاک

کوئٹہ (ڈیلی اردو) شورش زدہ صوبہ بلوچستان کے علاقے زیارت کراس میں اسسٹنٹ کمشنر ہرنائی کے اسکواڈ پر مبینہ دہشتگردوں نے گھات لگا کر حملہ کردیا، جس کے بعد سیکیورٹی فورسز اور حملہ آوروں کے درمیان شدید فائرنگ کا تبادلہ ہوا۔

ابتدائی اطلاعات کے مطابق سیکیورٹی فورسز کی جوابی کارروائی میں 11 دہشتگرد ہلاک ہوگئے، جبکہ حملے کا مقابلہ کرتے ہوئے 8 سیکیورٹی اہلکار بھی ہلاک ہونے کی اطلاعات ہیں۔

ذرائع کے مطابق حملہ اس وقت کیا گیا جب اسسٹنٹ کمشنر ہرنائی کا اسکواڈ زیارت کراس کے علاقے سے گزر رہا تھا۔ حملے کے بعد سیکیورٹی اہلکاروں نے فوری جوابی کارروائی کرتے ہوئے علاقے کو گھیرے میں لے لیا اور ممکنہ خطرات سے نمٹنے کے لیے سرچ اور کلیئرنس آپریشن شروع کردیا۔

مزید نفری بھی علاقے میں پہنچ گئی ہے، جبکہ سیکیورٹی اہلکار اطراف کے علاقوں میں تلاشی لے رہے ہیں تاکہ کسی ممکنہ حملہ آور یا سہولت کار کی موجودگی کا سراغ لگایا جاسکے۔

ابتدائی اطلاعات میں ہلاکتوں کی تعداد بتائی گئی ہے تاہم واقعے سے متعلق تاحال تفصیلی سرکاری بیان سامنے نہیں آیا۔ حکام کی جانب سے حتمی تفصیلات جاری ہونے کے بعد ہلاکتوں اور واقعے کے دیگر پہلوؤں کی مزید وضاحت متوقع ہے۔