سعودی ائیر پورٹ پر حوثی باغيوں کے ڈرون حملے، فضائی آپریشن معطل

ریاض + صنعا (ڈیلی اردو/نیوز ایجنسی) یمن کے حوثیوں کی جانب سے سعودی عرب کے ابہا ائیرپورٹ پر دو ڈرون حملے کیے گئے اور حوثی ترجمان کے مطابق ائیرپورٹ کے مانیٹرنگ ٹاور اور دیگر حساس مقامات کو نشانہ بنانے کی وجہ سے فضائی آپریشن متاثر ہوا تاہم اتحادی افواج کا کہنا ہے کہ حملے کو ناکام بنا دیا گیا۔

الجزیرہ ٹی وی کے مطابق حوثی باغیوں نے سعودی عرب کے جنوبی شہر ابہا کے ائیرپورٹ پر دو ڈرون حملے کیے جس کی سعودی اتحادی فوج کے ترجمان نے حوثی باغیوں کے حملوں کی تصدیق کرتے ہوئے بتایا کہ جمعہ کو باغیوں کے ڈرون حملوں کو فوری ناکام بناتے ہوئے ڈرون کو گرا دیا گیا۔

المسیرہ ٹی وی کے حوالے سے بتایا گیا کہ حوثیوں کا کہنا ہے کہ انہوں نے جمعرات کے روز ابہا ائیرپورٹ کے مانیٹرنگ ٹاور اور سعودی عرب کے دیگر حساس مقامات کو نشانہ بنایا جس کے باعث فضائی آپریشن متاثر ہوا۔

https://twitter.com/MasirahTV/status/1159549502065401856?s=19

واضح رہے کہ گزشتہ ہفتے بھی حوثی ملیشیا کی جانب سے ابہا اور نجران شہر کے سویلین ائیرپورٹس سمیت کنگ خالد ائیر بیس کو بھی ڈرون حملوں کا نشانہ بنایا گیا تھا۔

رپورٹ کے مطابق حوثی باغیوں کے حملے کے جواب میں سعودی اتحاد نے گروپ سے وابستہ ٹھکانوں بالخصوص یمنی دارالحکومت صنعا کے نواح میں عسکری مقامات کو نشانہ بنایا۔