سعودی عرب میں امریکی سفارتخانے پر حملے کا ایران کو جلد جواب دیا جائیگا، صدر ٹرمپ

واشنگٹن (ڈیلی اردو ) امریکی صدر ڈونلڈ ٹرمپ نے کہا ہے کہ ریاض میں امریکی سفارت خانے پر حملے کا ’’جلد جواب دیا جائے گا‘‘۔

کیبل نیٹ ورک نیوز نیشن کی صحافی کیلی میئر نے سوشل میڈیا پلیٹ فارم ایکس (X) پر لکھا کہ صدر ٹرمپ نے انھیں بتایا کہ وہ نہیں سمجھتے کہ ایران کے اندر زمینی فوج اتارنے کی ضرورت پیش آئے گی۔

واضح رہے کہ پیر کے روز امریکہ نے اعلان کیا تھا کہ حالیہ لڑائی کے دوران اس کے چھ فوجی ہلاک جبکہ 18 زخمی ہوئے ہیں۔

ایران آپریشن کے مقاصد کیا ہیں؟

صدر ٹرمپ نے ایک فوجی اعزازی تقریب سے خطاب کرتے ہوئے کہا کہ امریکہ ایران میں ’’بڑے پیمانے پر جنگی کارروائیاں‘‘ جاری رکھے ہوئے ہے تاکہ ایرانی حکومت کی طرف سے لاحق خطرات کو ختم کیا جا سکے۔

ان کے مطابق جاری آپریشن کے مقاصد ’’واضح‘‘ ہیں، جن میں:

ایران کی میزائل صلاحیتوں کو تباہ کرنا

ایرانی بحریہ کو نیست و نابود کرنا

ایران کو ایٹمی ہتھیار حاصل کرنے سے روکنا

ٹرمپ نے کہا کہ ایران ’’اپنی سرحدوں سے باہر دہشت گرد افواج کو اسلحہ، فنڈز اور ہدایات فراہم کرنا جاری نہیں رکھ سکتا۔‘‘

امریکی صدر نے کہا کہ ملک ان چار امریکی فوجیوں کے لیے سوگ منا رہا ہے جو کارروائی کے دوران ہلاک ہوئے، اور ان کی یاد میں مشن کو ’’غیر متزلزل عزم‘‘ کے ساتھ جاری رکھا جائے گا۔

انھوں نے مزید کہا کہ آپریشن اپنے ابتدائی اندازوں سے ’’کافی آگے‘‘ ہے۔ ابتدا میں چار سے پانچ ہفتوں کا تخمینہ لگایا گیا تھا، تاہم ان کے بقول امریکہ کے پاس ’’اس سے کہیں زیادہ دیر تک جانے کی صلاحیت ہے۔‘‘

یہ تقریب دراصل تین امریکی فوجیوں کو بعد از مرگ میڈل آف آنر دینے کے لیے منعقد کی گئی تھی، جنہوں نے 1945 میں جرمنی، بعد ازاں ویتنام اور افغانستان کی جنگوں میں غیر معمولی بہادری کا مظاہرہ کیا تھا۔

تقریب میں موجود صحافیوں میں یہ سوال بھی زیرِ بحث رہا کہ آیا صدر سے یہ پوچھا جا سکے گا کہ جنگ شروع کرنے کی ضرورت کیوں پیش آئی، اور ایران میں ’’فتح‘‘ کس صورت میں تصور کی جائے۔