سعودی عرب پر حملوں کے خدشات، ریاض میں خلیج اور یورپی یونین کا سربراہی اجلاس ملتوی

ریاض (ڈیلی اردو) خلیج تعاون کونسل اور یورپی یونین کا سربراہی اجلاس، جو 24 اکتوبر 2026 کو سعودی دارالحکومت ریاض میں منعقد ہونا تھا، ملتوی کردیا گیا ہے۔ اجلاس کی نئی تاریخ دونوں فریق باہمی مشاورت سے بعد میں طے کریں گے۔

خلیج تعاون کونسل کے سیکریٹری جنرل جاسم محمد البدیوی کے مطابق یہ فیصلہ سعودی عرب اور اس کی شہری تنصیبات کو نشانہ بنانے کی حوثی باغیوں کی مبینہ کوششوں اور ریاض کے شاہ خالد بین الاقوامی ہوائی اڈے کی آپریشنل سرگرمیاں معطل رہنے کے باعث کیا گیا۔ ان کے مطابق اجلاس میں شریک وفود کی سلامتی کو یقینی بنانا بھی فیصلے کی اہم وجہ ہے۔

البدیوی نے کہا کہ خلیج تعاون کونسل اور یورپی یونین اجلاس کے انعقاد کے لیے مناسب حالات پیدا کرنے اور باہمی تعاون کو مزید مضبوط بنانے کے لیے پُرعزم ہیں۔ ان کا کہنا تھا کہ دونوں فریق ایسے اقدامات جاری رکھیں گے جن سے ان کے ممالک اور عوام کے لیے ترقی اور خوشحالی کے مواقع بڑھ سکیں۔

اجلاس میں خلیجی ممالک اور یورپی یونین کے درمیان تعلقات اور مشترکہ تعاون پر بات چیت متوقع تھی، تاہم نئی تاریخ کے اعلان تک اس کے آئندہ شیڈول کے بارے میں مزید تفصیلات سامنے نہیں آئی ہیں۔