سعودی عرب کی ایران کو یقین دہانی، فضائی حدود استعمال نہ ہونے کا اعلان

واشنگٹن (ڈیلی اردو) سعودی عرب نے ایران کو یقین دہانی کرائی ہے کہ وہ اپنی فضائی حدود یا سرزمین کو ایران کے خلاف کسی بھی فوجی کارروائی کے لیے استعمال کرنے کی اجازت نہیں دے گا۔

سعودی میڈیا کے مطابق ایرانی صدر مسعود پزشکیان نے سعودی ولی عہد محمد بن سلمان سے ٹیلی فونک رابطہ کیا۔ اس موقع پر محمد بن سلمان نے واضح کیا کہ سعودی عرب اپنی فضائی حدود یا زمینی حدود کو ایران کے خلاف کسی بھی فوجی کارروائی یا کسی بھی فریق کی جانب سے حملے کے لیے استعمال کرنے کی اجازت نہیں دے گا، چاہے حملے کی منزل یا مقصد کچھ بھی ہو۔

ایرانی صدر نے گفتگو کے دوران اسرائیل اور امریکہ پر حالیہ مظاہروں میں مشتعل عناصر کو اکسانے کا الزام عائد کیا۔ ان کا کہنا تھا کہ دونوں ممالک نے یہ تصور کیا تھا کہ ان کارروائیوں کے ذریعے ایران کو شام یا لیبیا جیسی صورتحال سے دوچار کیا جا سکتا ہے، تاہم ایرانی قوم کی وسیع اور شعوری موجودگی نے ان کے مقاصد اور سازشوں کو ناکام بنا دیا۔

ایرانی میڈیا رپورٹس کے مطابق محمد بن سلمان نے اس موقع پر یہ بھی کہا کہ سعودی عرب ایران کے خلاف کسی بھی قسم کے خطرے یا کشیدگی کو ناقابل قبول سمجھتا ہے اور خطے میں دیرپا امن اور سلامتی کے قیام کے لیے تعاون کے لیے تیار ہے۔

دوسری جانب امریکی صدر ڈونلڈ ٹرمپ نے اعلان کیا ہے کہ ایک امریکی بحری بیڑہ ایران کی جانب بڑھ رہا ہے۔ اس سے قبل امریکی محکمہ دفاع کے ادارے سینٹ کام نے ایکس (سابقہ ٹوئٹر) پر اپنی پوسٹ میں تصدیق کی تھی کہ طیارہ بردار بحری جہاز ابراہم لنکن بحر ہند میں داخل ہو چکا ہے۔

امریکی جنگی بحری بیڑے کی مشرقِ وسطیٰ آمد کے بعد ایران نے آبنائے ہرمز میں فوجی مشقوں کا اعلان کر دیا ہے۔ ادھر پاسدارانِ انقلاب نے بھی دوٹوک الفاظ میں خبردار کیا ہے کہ اگر امریکی جہاز ایرانی سمندری حدود میں داخل ہوئے تو ان پر حملہ کیا جائے گا۔