سندھ: ٹھٹھہ میں دوسری جماعت کی طالبہ دعا ولاسیو زیادتی کے بعد قتل، دو ملزمان گرفتار

ٹھٹھہ (ڈیلی اردو) سندھ کے ضلع ٹھٹھہ میں گذشتہ روز لاپتہ سات سالہ معصوم بچی کی لاش کھیتوں سے برآمد ہونے پر شہر سوگ میں ڈوب گیا ہے۔

تفصیلات کے مطابق گذشتہ روز ٹھٹھہ کے ساحلی تحصیل گھوڑا باری کے علاقے و شہر میں سات سالہ دوسری جماعت کی طالبہ دعا ولاسیو کو قتل کردیا گیا تھا، معصوم بچی کی لاش رات گے کیلے کی فصل سے برآمد کی گئی۔

واقعے پر طالبہ دعا کے ورثا کا کہنا تھا کہ بچی کئی گھنٹے گزرنے کے بعد گھر نہیں پہنچی، تو انہیں تشویش لاحق ہوئی، ڈھونڈنے کے دوران بچی کی لاش گاؤں کے قریب کیلے کے فصل سے برہنہ حالت میں ملی، اطلاع دینے کے بعد پولیس موقع پر پہنچی اور لاش کو تحویل میں لیکر رات گئے پوسٹ مارٹم کیلئے سول ہسپتال منتقل کیا گیا۔

ڈاکٹر کے مطابق پوسٹ مارٹم کی ابتدائی میڈیکل رپورٹ میں جنسی زیادتی کی کوشش اور دم گھٹنے سے موت واقع ہوئی ہے جبکہ حتمی میڈیکل رپورٹ آنے کے بعد موت کا سبب معلوم ہوسکے گا۔

معصوم بچی کی تدفین انکے آبائی قبرستان میں کردی گئی ہے جبکہ پولیس نے کارروائی کرتے ہوئے دو افراد کو گرفتار کیا ہے۔

ایس ایس پی ٹھٹھہ شبیر احمد سیٹھار نے ڈیلی اردو کو بتایا کہ دعا ولاسیو سے ریپ اور قتل میں ملوث 2 ملزمان ارشاد ملاح اور سکندر عرف سکو شاہ کو گرفتار کرلیا ہے۔ ملزم ارشاد ملاح جو کہ مقتول بچی کا چچا ہے، ملزم نے 20 روپے خرچ دے کر بچی کو کہا کہ باغ سے کیلے لے کر آتے ہیں جہاں موجود دوسرے ملزم سکندر عرف سکو شاہ نے مل کر معصوم بچی دعا کے ساتھ جنسی زیادتی کر کے اسے قتل کر دیا۔

دوران تفتیش ملزمان نے اعتراف بھی کیا ہے اور بچی کے کپڑے بھی برآمد کرلیے گئے ہیں۔

دوسری جانب معصوم بچی کے قتل کے خلاف ور شہر میں مکمل شٹر بند ہڑتال ہے اور تمام کاروباری مراکز بند ہے اور شہر میں سوگ کا سماں ہے۔