سوات میں انٹیلی جنس اداروں کا آپریشن، کالعدم ٹی ٹی پی کمانڈر سمیت 2 دہشت گرد ہلاک

راولپنڈی + سوات (نمائندگان ڈیلی اردو) صوبہ خیبرپختونخوا کے ضلع سوات کے علاقے چارباغ میں قانون نافذ کرنے والے اداروں نے انٹیلی جنس پر مبنی مشترکہ آپریشن کے دوران شدید فائرنگ کے تبادلے میں کالعدم ٹی ٹی پی کے کمانڈر عطاء اللہ عرف مہران سمیت 2 خوارجی دہشت گرد کو ہلاک کر دیا۔

پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان میں بتایا گیا کہ قانون نافذ کرنے والے اداروں نے سوات کے علاقے چار باغ میں مشترکہ آپریشن 4 اور 5 اکتوبر کی شب انٹیلی جنس کی اطلاع پر کیا۔

آئی ایس پی آر کا کہنا تھا کہ آپریشن کے دوران شدید فائرنگ کے تبادلے کے بعد کالعدم تنظیم تحریک طالبان پاکستان کا سرغنہ عطاء اللہ سمیت 2 خوارجی دہشت گرد ہلاک ہوگئے جبکہ ایک دہشت گرد کو زخمی حالت میں گرفتار بھی کیا گیا ہے۔

پاکستانی فوج کے شعبہ تعلقات عامہ نے بتایا کہ خارجی عطا اللہ عرف مہران علاقے میں دہشت گردوں کی متعدد سرگرمیوں میں ملوث تھا، اس نے 22 ستمبر 2024 کو سوات میں غیر ملکی سفارت کارروں کے قافلے کو لے جانے والی پولیس گاڑی پر آئی ای ڈی دھماکا کرنے کا بھی ذمہ دار تھا۔

ایک سینئر سیکیورٹی اہلکار نے ذرائع ابلاغ کو بتایا ہے کہ ہلاک دہشت گرد دیسی ساختہ ریموٹ کنٹرول بم بنانے اور نصب کرنے کا ماہر تھا، جو گزشتہ ماہ 22 ستمبر کو سوات کا دورہ کرنے والے سفارت کاروں کے قافلے پر حملہ کرنے میں ملوث تھا۔

آئی ایس پی آر کے مطابق قانون نافذ کرنے والے اداروں کے ساتھ مل کر سیکیورٹی فورسز ملک سے دہشت گردی کی لعنت کے خاتمے کے لیے پرعزم ہیں۔

پاک فوج کے شعبہ تعلقات عامہ نے بتایا کہ علاقے میں پائے جانے والے کسی اور خارجی کے خاتمے کے لیے کلیرنس آپریشن جاری ہے۔