سوات میں سیکیورٹی فورسز کا آپریشن، ٹی ٹی پی کے 4 شدت پسند ہلاک

راولپنڈی (ک م) خیبر پختونخوا کے ضلع سوات میں سیکیورٹی فورسز اور قانون نافذ کرنے والے اداروں نے مشترکہ انٹیلی جنس بیسڈ آپریشن کے دوران 4 شدت پسندوں کو ہلاک کر دیا ہے۔

پاکستانی فوج کے شعبہ تعلقات عامہ (آئی ایس پی آر) کے مطابق یہ کارروائی شدت پسندوں (جنہیں سرکاری طور پر خوارج کہا جاتا ہے) کی موجودگی کی خفیہ اطلاع پر کی گئی۔ سیکیورٹی اہلکاروں نے موثر کارروائی کرتے ہوئے ان کے ایک ٹھکانے کو نشانہ بنایا جس کے نتیجے میں چار شدت پسند مارے گئے۔

ہلاک ہونے والے شدت پسندوں کے قبضے سے اسلحہ اور گولہ بارود بھی برآمد کیا گیا ہے۔ آئی ایس پی آر کے مطابق یہ شدت پسند سوات اور گرد و نواح میں دہشت گردی کی متعدد وارداتوں میں ملوث تھے۔

علاقے کو مزید کلیئر کرنے اور کسی بھی ممکنہ خطرے کے خاتمے کے لیے سرچ آپریشن جاری ہے۔

فوج کے ترجمان کے مطابق سیکیورٹی فورسز اور قانون نافذ کرنے والے ادارے ملک سے دہشت گردی کے خاتمے کے لیے پرعزم ہیں۔

واضح رہے کہ پاکستان میں کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کے لیے سرکاری سطح پر ’خوارج‘ کی اصطلاح استعمال کی جاتی ہے۔