سوات میں سی ٹی ڈی اور پولیس کی کارروائی، ٹی ٹی پی سے وابستہ 3 مبینہ دہشتگرد ہلاک، 2 فرار

سوات(ڈیلی اردو) خیبرپختونخواہ کے شورش زدہ ضلع سوات کے علاقے کنجو میں محکمہ انسداد دہشتگردی (سی ٹی ڈی) اور ضلعی پولیس نے مشترکہ انٹیلی جنس بنیادوں پر کارروائی کرتے ہوئے کالعدم تحریک طالبان پاکستان (ٹی ٹی پی) کے مظفر عرف خالد گروپ سے وابستہ 3 مبینہ دہشتگردوں کو ہلاک کردیا، جبکہ 2 مشتبہ افراد فرار ہوگئے، جن کی تلاش جاری ہے۔

سی ٹی ڈی کے مطابق کارروائی جمعرات کی علی الصبح سکھاڈوب کے علاقے میں کی گئی۔ حکام کو اطلاع ملی تھی کہ مظفر عرف خالد گروپ کے مشتبہ ارکان سیگرام، لالو بانڈہ اور ملحقہ پہاڑی علاقوں میں موجود ہیں اور مبینہ طور پر دہشتگردی کی منصوبہ بندی کررہے ہیں۔ سکیورٹی اہلکاروں کے پہنچنے پر ملزمان نے فائرنگ کردی اور قریبی مکان میں پناہ لے کر فائرنگ جاری رکھی، جس کے بعد جوابی کارروائی کی گئی۔

سی ٹی ڈی کے مطابق فائرنگ رکنے کے بعد مکان کی تلاشی لی گئی تو وہاں سے 3 لاشیں ملیں۔ ہلاک افراد کی شناخت عبداللہ ولد سید بشیر، منصور علی ولد عبدالمطلوب، سوات کے علاقے نیلگرام، اور غفران اللہ ولد افضل خان، ساکن شیدالا، شکردرہ کے ناموں سے کی گئی۔ محکمہ انسداد دہشتگردی کا کہنا ہے کہ تینوں کا تعلق مظفر عرف خالد گروپ سے تھا۔

کارروائی کے دوران جائے وقوعہ سے 3 کلاشنکوفیں، 6 میگزین، متعدد کارتوس، گیس سلنڈر، کھانا پکانے کے برتن، شکردرہ تھانے کا نقشہ اور ایک ڈائری بھی برآمد کرنے کا دعویٰ کیا گیا ہے۔ حکام نے نقشے اور ڈائری کے مندرجات یا ان کی ممکنہ اہمیت کے بارے میں مزید تفصیلات نہیں بتائیں۔

سی ٹی ڈی کے ابتدائی بیان کے مطابق ہلاک افراد رواں سال سوات میں پیش آنے والے متعدد دہشتگردی کے واقعات میں مبینہ طور پر ملوث تھے۔ ان واقعات میں افضل خان گجر پر فائرنگ، نعمت علی خان کے گھر اور حجرے پر فائرنگ اور نیلگرام میں سلیم اللہ عرف ساجد کا ٹارگٹ کلنگ کا واقعہ شامل ہے۔ ان الزامات کی مزید تفتیش جاری ہے، جبکہ فرار ہونے والے دونوں مشتبہ افراد کی گرفتاری کے لیے تلاش بھی جاری ہے۔