سوات میں پولیس اور سی ٹی ڈی کی کارروائی، کالعدم ٹی ٹی پی کے تین اہم دہشت گرد ہلاک

سوات (نمائندہ ڈیلی اردو) خیبرپختونخوا کے ضلع سوات میں پولیس اور کاؤنٹر ٹیررازم ڈیپارٹمنٹ (سی ٹی ڈی) نے مشترکہ انٹیلیجنس بیسڈ آپریشن کے دوران کالعدم تحریک طالبان پاکستان (ٹی ٹی پی) کے تین اہم دہشت گردوں کو ہلاک کر دیا۔

ڈی پی او سوات کے ترجمان معین فیاض کے مطابق، یہ کارروائی تحصیل کبل کے علاقے شلخو سر میں کی گئی۔ ہلاک دہشت گردوں کی شناخت اجمل عرف وقاص، مطیع اللہ عرف اسحٰق اور رحیم اللہ رحمانی عرف روح کے ناموں سے ہوئی ہے۔

ترجمان کے مطابق اجمل عرف وقاص ملوک آباد کا رہائشی تھا، جو دہشت گردی کے 9 مقدمات میں مطلوب تھا اور 8 افراد کے قتل میں ملوث تھا۔ مطیع اللہ عرف اسحٰق کے خلاف ضلع شانگلہ میں 2 مقدمات درج تھے۔ رحیم اللہ رحمانی عرف روح اللہ ولد امان اللہ، افغانستان کے علاقے شیری، نورستان کا رہائشی تھا اور دہشت گردی کے 2 مقدمات میں مطلوب تھا۔

ڈی پی او سوات محمد عمر کی ہدایت پر ضلع بھر میں سرچ اینڈ اسٹرائیک آپریشن جاری ہے، جبکہ داخلی و خارجی راستوں پر پولیس چیکنگ مزید سخت کر دی گئی ہے۔ ترجمان کا کہنا تھا کہ پولیس سوات کے امن کو ہر حال میں برقرار رکھے گی۔

ذرائع کے مطابق علاقے میں سیکیورٹی ہائی الرٹ کر دی گئی ہے اور دہشت گردوں کے سہولت کاروں کے خلاف بھی کارروائی متوقع ہے۔