سیکورٹی فورسز کے شمالی، جنوبی وزیرستان اور ڈیرہ اسماعیل خان میں آپریشنز، 3 دہشت گرد اور فوجی ہلاک

راولپنڈی (ک م) پاکستانی سکیورٹی فورسز نے صوبہ خیبر پختونخوا کے تین مختلف اضلاع شمالی و جنوبی وزیرستان اور ڈیرہ اسماعیل خان میں الگ الگ آپریشنز کیے جس دوران 3 دہشتگرد ہلاک ہوگئے۔

پاکستانی فوج کے شعبہ تعلقات علامہ (آئی ایس پی آر) کے مطابق سکیورٹی فورسز نے صوبہ خیبر پختونخوا کے ضلع ڈیرہ اسماعیل خان کے علاقے کلاچی میں انٹیلی جنس بنیادوں پر آپریشن کیا جس میں 2 دہشت گرد مارے گئے جب کہ جنوبی وزیرستان کے علاقے کوٹ اعظم میں بھی آپریشن کے دوران ایک دہشت گرد مارا گیا۔

آئی ایس پی آر کے مطابق مارے گئے دہشتگرد فورسز اور سویلینز پر حملوں میں ملوث تھے اور ان سے اسلحہ بھی برآمد کیا گیا ہے۔

آئی ایس پی آر کا بتانا ہے کہ شمالی وزیرستان کے علاقے گھڑیوم میں بارودی مواد پھٹنے سے سپاہی شاہزیب ہلاک ہوگیا۔

آئی ایس پی آر کا کہنا ہے کہ علاقے میں دیگر دہشتگردوں کے خاتمے کے لیے کلیئرنس آپریشن جاری ہے، سکیورٹی فورسز دہشتگردی کے خاتمے کے لیے پرعزم ہیں، ہمارے بہادر جوانوں کی قربانیاں ہمارے عزم کو مزید مضبوط بناتی ہیں۔

ترجمان پاک فوج کے مطابق شمالی وزیرستان کے علاقے گھڑیوم میں دیسی ساختہ بم پھٹنے کے نتیجے میں ہلاک ہونے والے سپاہی شاہ زیب کی نماز جنازہ ادا کردی گئی، 26 سالہ سپاہی شاہزیب کی نمازجنازہ راولپنڈی میں ان کے آبائی قصبہ گوجر خان میں ادا کی گئی۔

نمازجنازہ کی ادائیگی کے بعد سپاہی شاہزیب کو پورے فوجی اعزاز کے ساتھ سپرد خاک کر دیا گیا۔

نمازجنازہ میں سینئر حاضر سروس فوجی افسران، عزیز و اقارب اور اہل علاقہ نے شرکت کی۔

ترجمان کے مطابق مسلح افواج مادر وطن سے دہشت گردی کی لعنت کو ہر قیمت پر ختم کرنے کے لئے پرعزم ہیں۔