سیکیورٹی فورسز کے خیبر اور نوشکی میں آپریشنز: 32 دہشت گرد ہلاک

راولپنڈی (ڈیلی اردو) پاکستانی فوج کے شعبہ تعلقات عامہ (آئی ایس پی آر) نے کہا ہے کہ خیبر پختونخوا اور بلوچستان کے مختلف علاقوں میں سیکیورٹی فورسز کی کارروائیوں کے دوران 32 دہشت گرد ہلاک کر دیے گئے ہیں۔

آئی ایس پی آر کے مطابق 28 اور 29 جولائی کی درمیانی شب خیبر پختونخوا کے ضلع خیبر میں انٹیلی جنس اطلاعات کی بنیاد پر متعدد آپریشنز کیے گئے، جن کے دوران کالعدم تحریک طالبان پاکستان (ٹی ٹی پی) سے وابستہ 24 دہشت گرد ہلاک ہوئے۔

بیان کے مطابق بلوچستان کے ضلع نوشکی میں بھی انٹیلی جنس بنیادوں پر کارروائیاں کی گئیں، جہاں سیکیورٹی فورسز اور دہشت گردوں کے درمیان شدید فائرنگ کے تبادلے میں 8 دہشت گرد مارے گئے۔ 

 سیکورٹی ذرائع نے ڈیلی اردو کو بتایا کہ نوشکی میں ہلاک ہونے والے دہشت گردوں کا تعلق کالعدم بلوچ لبریشن آرمی (بی ایل اے) سے تھا۔

آئی ایس پی آر کے مطابق کارروائیوں کے دوران دہشت گردوں کے قبضے سے اسلحہ، گولہ بارود اور دیسی ساختہ دھماکہ خیز مواد برآمد کر کے تباہ کر دیا گیا۔

اعلامیے میں کہا گیا کہ سیکیورٹی فورسز خیبر پختونخوا اور بلوچستان میں دہشت گرد گروہوں کے خلاف آپریشنز جاری رکھے ہوئے ہیں اور علاقے میں موجود دیگر دہشت گردوں اور ان کے سہولت کاروں کے خاتمے کے لیے کلیئرنس کارروائیاں جاری ہیں۔