شام: حلب میں دہشت گردوں کا اسپورٹس کلب پر مارٹر حملہ، آٹھ بچوں سمیت 10 شہید، 13 زخمی

دمشق (ڈیلی اردو) شام میں دہشت گردوں نے شمالی حلب کے قصبے ٹال رفعت میں ایک اسپورٹس کلب پر حملہ کیا، جس میں آٹھ بچوں سمیت 10 افراد شہید اور 13 زخمی ہوگئے۔

شام میں روسی مرکز کے سربراہ میجر جنرل یوری بورینکوف کے مطابق شامی صوبے کے ٹال رفعت نامی قصبے میں دہشت گردوں نے ایک اسپورٹس کلب پر حملہ کیا۔‘‘ دہشت گردوں نے 120 ملی میٹرکے مارٹر داغے۔ اس حملے میں 8 بچوں سمیت 10 افراد شہید جبکہ 13 دیگر زخمی ہوگئے۔ زخمیوں میں سات بچے شامل ہیں، جن میں سے دو کی حالت تشویشناک ہے۔

مسٹر بورینکوف کے مطابق ادلب میں گزشتہ 24 گھنٹوں کے دوران، دہشت گردوں نے 40 افراد پر حملہ کیا، جس میں عام لوگوں کو نشانہ بنایا گیا۔ اس سے قبل شام کے شمالی علاقے میں تازہ حملوں میں آٹھ بچوں کی موت ہو چکی ہے۔

گزشتہ ایک ماہ کے دوران شام میں ہونے والے تشدد میں کم از کم 34 بچے شہید ہوگئے ہیں۔

اقوام متحدہ کے بچوں کے فنڈ (یونیسف) کے ریجنل ڈائریکٹر ٹیڈ چییابن نے پیر کے روز کہا ، ’’ہمیں ان خبروں سے حیرت اور افسوس ہوا ہے کہ شمالی حلب کے قصبے ٹال رفعت میں تازہ حملوں میں آٹھ بچے شہید ہوگئے ہیں۔ شہدا بچوں کی عمریں 15 سال سے کم تھیں۔‘‘

یونیسف کے ریجنل ڈائریکٹر نے شام میں سرگرم تمام فریقوں پر زور دیا ہے کہ وہ بچوں کی حفاظت کو یقینی بنائیں، ساتھ ہی ساتھ بچوں کو نشانہ بنانے والی تنظیموں کو سنگین نتائج بھگتنے کی وارننگ بھی دیں۔