شام میں دو دھماکے، فرانسیسی صدر ماکروں محفوظ، 18 افراد زخمی

دمشق (ڈیلی اردو) شام کے دارالحکومت دمشق میں منگل کو اس ہوٹل کے قریب دو دھماکے ہوئے جہاں فرانسیسی صدر ایمانوئل ماکروں قیام پذیر تھے۔ دھماکے کے نتیجے میں کم از کم 18 افراد زخمی ہو گئے۔

میڈیا رپورٹس کے مطابق دھماکوں کے وقت صدر ماکروں ہوٹل میں موجود نہیں تھے۔ وہ پہلے ہی  شام  کے صدارتی محل روانہ ہو چکے تھے، جہاں ان کی صدر احمد الشرع سے ملاقات طے تھی۔

عینی شاہدین کے مطابق دھماکوں کی آوازیں دمشق کے مختلف علاقوں میں سنی گئیں، جبکہ فور سیزنز ہوٹل کے نزدیک دھوئیں کے بادل بھی دیکھے گئے۔ واقعے کے فوری بعد سکیورٹی فورسز نے علاقے کو گھیرے میں لے لیا، سڑکیں بند کر دی گئیں اور متعدد ایمبولینسیں جائے وقوعہ پر پہنچ گئیں۔

شامی وزارتِ داخلہ کے مطابق ایک بم سڑک کنارے کھڑی گاڑی میں نصب کیا گیا تھا جبکہ دوسرا ایک کچرے کے کنٹینر میں رکھا گیا تھا۔ وزارت کا کہنا ہے کہ دونوں دھماکے اس وقت ہوئے جب دھماکہ خیز مواد کو ناکارہ بنانے کی تیاریاں جاری تھیں۔

سرکاری میڈیا کے مطابق زخمی ہونے والوں میں چار پولیس اہلکار بھی شامل ہیں۔ دھماکوں سے قریبی  عمارتوں کے شیشے ٹوٹ گئے جبکہ علاقے میں سکیورٹی مزید سخت کر دی گئی۔

37 سالہ مقامی شہری حمام حمود نے بتایا کہ انہوں نے تین ٹریفک پولیس اہلکاروں کو زخمی حالت میں زمین پر پڑا دیکھا، جس کے بعد علاقے کو خالی کروا کر تمام راستے بند کر دیے گئے۔

دھماکے ایسے وقت میں ہوئے جب شامی سرکاری ٹیلی ویژن صدر ماکروں کی صدارتی محل آمد کا اعلان کر رہا تھا۔ تاہم فرانسیسی ایوانِ صدر (ایلیزے پیلس) نے واضح کیا ہے کہ ماکروں اپنا دورہ معمول کے مطابق جاری رکھیں گے۔

فرانس کے صدر ماکروں 2024 میں بشار الاسد حکومت کے خاتمے کے بعد شام کا دورہ کرنے والے پہلے  مغربی یورپی رہنما ہیں۔ اپنے دورے کے دوران وہ شام کی جنگ کے بعد تعمیرِ نو، سیاسی استحکام، قومی یکجہتی اور کثیرالجہتی نظام کے فروغ پر شامی قیادت سے بات چیت کر رہے ہیں۔

 انہوں نے سول سوسائٹی کے نمائندوں سے بھی ملاقات کی ہے۔دھماکے ایسے وقت میں ہوئے جب شامی سرکاری ٹیلی ویژن صدر ماکروں کی صدارتی محل آمد کا اعلان کر رہا تھا۔ تاہم فرانسیسی ایوانِ صدر (ایلیزے پیلس) نے واضح کیا ہے کہ ماکروں اپنا دورہ معمول کے مطابق جاری رکھیں گے۔

فرانس کے صدر ماکروں 2024 میں بشار الاسد حکومت کے خاتمے کے بعد شام کا دورہ کرنے والے پہلے  مغربی یورپی رہنما ہیں۔ اپنے دورے کے دوران وہ شام کی جنگ کے بعد تعمیرِ نو، سیاسی استحکام، قومی یکجہتی اور کثیرالجہتی نظام کے فروغ پر شامی قیادت سے بات چیت کر رہے ہیں۔ انہوں نے سول سوسائٹی کے نمائندوں سے بھی ملاقات کی ہے۔