شام کے ریف منبج میں داعش کے اہم کمانڈر کو گرفتار کرلیا گیا

دمشق(ڈیلی اردو) شام کے شہر منبج کے نواحی علاقے میں سیکیورٹی فورسز اور جنرل انٹیلی جنس کے اہلکاروں نے بین الاقوامی شراکت داروں کے تعاون سے کارروائی کرتے ہوئے داعش کے ایک اہم کمانڈر کو گرفتار کرلیا۔

شامی حکام کے مطابق گرفتار شخص کی شناخت حمزہ عبداللہ محمد کے نام سے ہوئی ہے، جسے تنظیم میں ابو جہاد المہاجر کے نام سے جانا جاتا ہے۔ اسے داعش کے اہم عسکری رہنماؤں میں شمار کیا جاتا ہے۔

حکام کے مطابق گرفتار شخص داعش کی نام نہاد ولایت شام میں عسکری امور کا سربراہ رہ چکا ہے، جبکہ اس سے قبل وہ عسکری سربراہ کے نائب کے طور پر بھی ذمہ داریاں انجام دے چکا ہے۔ اسے داعش کی نام نہاد ولایت ادلب سے متعلق ذمہ داریاں سنبھالنے والا بھی بتایا گیا ہے۔

سیکیورٹی حکام کے مطابق کارروائی داعش کی قیادت اور خفیہ نیٹ ورک کے خلاف جاری اقدامات کا حصہ ہے، جس کا مقصد تنظیم کے باقی ماندہ ڈھانچے کو توڑنا اور اسے دوبارہ منظم ہونے سے روکنا ہے۔