شام : آسٹریا سے واپسی پر سابق پولیس افسر کو گرفتار کرلیاگیا

دمشق(ڈیلی اردو) شام کے شہر نوا میں سیکیورٹی اداروں نے سابق شامی پولیس افسر مصعب ابو رقبہ کو گرفتار کرلیا ہے۔ وہ آسٹریا سے شام واپس پہنچا تھا، جہاں ایک عدالت اسے 8 سال قید کی سزا سنا چکی ہے۔

شامی سیکیورٹی حکام کے مطابق 54 سالہ مصعب ابو رقبہ کو اس کے آبائی شہر نوا میں داخلی سیکیورٹی اہلکاروں نے حراست میں لیا۔ گرفتاری آسٹریا کی عدالت کی جانب سے سزا سنائے جانے کے چند ہفتے بعد عمل میں آئی۔

ذرائع کے مطابق ابو رقبہ نے اپیل کی کارروائی جاری رہنے کے دوران آسٹریا چھوڑ کر اگست کے آغاز میں شام واپسی اختیار کی تھی۔ شام پہنچنے پر اہل خانہ نے اس کے استقبال کے لیے تقریب بھی منعقد کی۔

رپورٹس کے مطابق آسٹریا کی عدالت نے ابو رقبہ کے ملک چھوڑنے کو کسی عدالتی حکم کی خلاف ورزی قرار نہیں دیا، کیونکہ مقدمے کی سماعت کے دوران وہ گرفتار نہیں تھا اور اس کی نقل و حرکت پر بھی پابندی عائد نہیں کی گئی تھی۔

آسٹریا میں سزا

ویانا کی علاقائی فوجداری عدالت نے 6 جولائی کو شام کے بحران کے ابتدائی دور سے متعلق ایک مقدمے میں مصعب ابو رقبہ کو 8 سال قید کی سزا سنائی تھی۔ اسے سنگین جسمانی نقصان پہنچانے، سنگین نوعیت کے جبر اور جنسی جبر سمیت مختلف جرائم میں قصوروار قرار دیا گیا۔

اسی مقدمے میں عدالت نے شام کے شہر رقہ میں سابق ریاستی سیکیورٹی برانچ کے سربراہ خالد الحلبی کو بھی 8 سال قید کی سزا سنائی تھی۔