شام : حمص میں بجلی کمپنی کے ملازمین کی بس پر حملہ، 5 افراد ہلاک

حمص( ڈیلی اردو) وسطی شام کے صوبے حمص میں نامعلوم مسلح افراد نے ایک نجی بجلی کمپنی کے ملازمین کو لے جانے والی بس پر حملہ کردیا، جس کے نتیجے میں 5 افراد ہلاک اور 4 زخمی ہوگئے۔

فرانسیسی خبر رساں ایجنسی کے مطابق حملے کا نشانہ بننے والی بس میں نجی بجلی کمپنی کے انجینئرز اور دیگر کارکن سوار تھے، جو کام ختم کرنے کے بعد اپنے گھروں کو واپس جا رہے تھے۔ حملہ حمص کے ایک علاقے میں اس وقت کیا گیا جب ملازمین واپسی کے سفر پر تھے۔

شام کی سرکاری خبر رساں ایجنسی کے مطابق حمص میں داخلی سکیورٹی کے سربراہ بریگیڈیئر باسم محمد شعبان نے واقعے کی تصدیق کرتے ہوئے بتایا کہ نامعلوم افراد نے شہری بس کو نشانہ بنایا، جس کے نتیجے میں متعدد افراد ہلاک اور زخمی ہوئے۔

سکیورٹی حکام کے مطابق حملے کے محرکات اور اس میں ملوث افراد کی شناخت فوری طور پر سامنے نہیں آسکی۔ حمص میں سکیورٹی فورسز نے واقعے کی تحقیقات اور حملہ آوروں کی تلاش شروع کردی ہے۔

حمص کے داخلی سکیورٹی کے سربراہ نے کہا ہے کہ حملے میں ملوث افراد کو گرفتار کرکے قانون کے مطابق کارروائی کی جائے گی، جبکہ سکیورٹی فورسز نے ملزمان کی گرفتاری تک کارروائی جاری رکھنے کا اعلان کیا ہے۔