شانگلہ میں سکیورٹی فورسز کا آپریشن، 3 دہشت گرد ہلاک، بنوں میں حملہ ناکام، ٹانک میں کرفیو نافذ

پشاور (نمائندگان ڈیلی اردو) پاکستان کے شورش زدہ صوبے خیبر پختونخوا کے ضلع شانگلہ میں سکیورٹی فورسز نے انٹیلیجنس بیسڈ آپریشن کے دوران 3 دہشت گردوں کو ہلاک کردیا۔

سکیورٹی ذرائع کے مطابق فورسز نے خفیہ اطلاع پر دہشت گردوں کا گھیراؤ کیا۔ فورسز کو دیکھتے ہی دہشت گردوں نے فائرنگ شروع کر دی، جس پر جوابی کارروائی میں تینوں دہشت گرد مارے گئے۔ ذرائع کا کہنا ہے کہ خوارج کے خلاف فورسز کی کارروائیاں جاری ہیں۔

ادھر ضلع بنوں میں سکیورٹی فورسز نے ولی نور اور سردی خیل چیک پوسٹوں پر دہشت گردوں کا حملہ ناکام بنا دیا۔ پولیس کے مطابق دہشت گردوں نے رات گئے چیک پوسٹوں پر فائرنگ کی تاہم فورسز کی بروقت اور موثر جوابی کارروائی سے حملہ آور فرار ہوگئے۔ واقعے میں کوئی جانی نقصان نہیں ہوا، تاہم فرار ہونے والے دہشت گردوں کی تلاش شروع کردی گئی ہے۔

سیکورٹی خدشات کے پیش نظر ضلع ٹانک کے سب ڈویژن جنڈولہ میں کل صبح 6 بجے سے شام 7 بجے تک کرفیو نافذ کرنے کا اعلان کیا گیا ہے۔ جاری اعلامیہ کے مطابق اس دوران ہر قسم کی نقل و حرکت، تجارتی سرگرمیاں اور بازار بند رہیں گے جبکہ کوڑ سے جنڈولہ تک مین شاہراہ عام ٹریفک کے لیے مکمل طور پر بند رہے گی۔