شمالی وزیرستان اور ٹانک میں فائرنگ کے دو واقعات، دو افراد ہلاک

پشاور (ڈیلی اردو) خیبرپختونخوا کے جنوبی اضلاع شمالی وزیرستان اور ٹانک میں نامعلوم مسلح افراد کی فائرنگ کے دو الگ الگ واقعات میں دو افراد ہلاک ہو گئے۔ واقعات کے بعد متعلقہ پولیس حکام نے تفتیش کا آغاز کر دیا ہے۔

پہلا واقعہ شمالی وزیرستان کی تحصیل میران شاہ کے علاقے ڈانڈے درپہ خیل میں پیش آیا، جہاں نامعلوم مسلح افراد نے فائرنگ کر کے صحافی نور بہرام کے بھانجے عامر خان کو اس وقت ہلاک کر دیا جب وہ شب جمعہ سے واپس آ رہے تھے۔ عامر خان کی نمازِ جنازہ میران شاہ کے تبلیغی مرکز میں ادا کی گئی جس میں رشتہ داروں، مقامی افراد اور سیاسی و سماجی نمائندوں کی بڑی تعداد نے شرکت کی۔ علاقے میں تاحال امن و امان کی صورت حال حساس بنی ہوئی ہے۔

دوسرا واقعہ ضلع ٹانک میں بلوچ بائی پاس کے قریب پیش آیا، جہاں نامعلوم حملہ آوروں نے فائرنگ کر کے گرہ بلوچ کے رہائشی نوجوان سکندر حسین لنگاہ کو ہلاک کر دیا۔ پولیس نے موقع پر پہنچ کر شواہد اکٹھے کر لیے ہیں اور واقعے کی تحقیقات جاری ہیں۔