شمالی وزیرستان اور ژوب میں سیکورٹی فورسز کے آپریشنز، سات دہشت گرد ہلاک

راولپنڈی (نمائندہ ڈیلی اردو) صوبہ خیبر پختونخوا کے قبائلی ضلع شمالی وزیرستان اور بلوچستان کے ضلع ژوب میں سکیورٹی فورسز کے آپریشنز میں 7 دہشت گرد ہلاک ہوگئے۔

پاکستانی فوجی کے شعبہ تعلقات عامہ آئی ایس پی آر کے مطابق خفیہ اطلاعات پر دہشت گردوں کے خلاف آپریشن شمالی وزیرستان کی تحصیل میر علی کے علاقے ہمزونی میں کیا گیا۔

آپریشن کے دوران 6 دہشت گردوں کو ہلاک کردیا گیا، ہلاک دہشت گردوں میں محمد علی، مطیع اللہ، محمد عمر، اخترحسین شیر اور وسیم شامل ہیں۔

دہشت گردوں کے قبضے سے سب مشین گنز، دستی بم، بارودی سرنگیں اور گولیاں برآمد کر لی گئیں۔

آئی ایس پی آر کے مطابق دہشت گردوں کی موجودگی کی اطلاع پر بلوچستان کے ضلع ژوب کے علاقے سمبازہ میں بھی سکیورٹی فورسز نے آپریشن کیا جس میں ایک دہشت گرد ہلاک ہوگیا۔

واضح رہے کہ 23 فروری کو بھی خیبرپختونخوا کے ضلع ڈیرہ اسماعیل خان میں سیکیورٹی فورسز نے آپریشن میں 2 دہشتگردوں کو ہلاک کردیا تھا۔

اس سے قبل 20 فروری کو بھی شمالی وزیرستان میں دہشتگردوں کی موجودگی کی خفیہ اطلاع پر سکیورٹی فورسز سے فائرنگ کے تبادلے میں 5 دہشت گرد مارے گئے تھے۔