شمالی وزیرستان: سیکیورٹی فورسز کی کارروائی میں تحریک طالبان پاکستان کے 6 دہشت گرد ہلاک، 2 گرفتار

اسلام آباد (ش ح ط) صوبہ خیبرپختونخوا کے قبائلی ضلع شمالی وزیرستان میں سیکیورٹی فورسز کے آپریشن میں کالعدم تنظیم تحریک طالبان پاکستان کے چھ دہشت گرد ہلاک ہوگئے۔

ذرائع کے مطابق سیکیورٹی فورسز نے گزشتہ شب شمالی وزیرستان کی تحصیل میرعلی کے علاقے موسکی میں ایک ٹھکانے میں دہشتگردوں کی موجودگی پر کارروائی کی۔

ذرائع کے مطابق اس دوران حافظ گل بہادر گروپ کے 6 دہشت گرد مارے گئے۔ جبکہ دو دہشت گردوں کو زخمی حالت میں گرفتار کرلیا گیا ہے۔

سرکاری ذرائع کے مطابق یہ دہشت گرد ٹارگنٹ کلنگ، اغوا برائے تاوان، بھتہ خوری، سیکیورٹی فورسز پر حملوں اور آئی ای ڈی دھماکوں میں ملوث تھے۔

سرکاری ذرائع نے ڈیلی اردو کو بتایا کہ آپریشن کے دوران سیکیورٹی فورسز اور دہشت گردوں میں فائرنگ کا تبادلہ ہوا اور اس آپریشن میں 6 دہشت گرد مارے گئے، جن کی شناخت سنگری، ثاقب، جمشید، آمین، بے تاب اور قہرمان کے نام سے ہوئی۔

سیکیورٹی فورسز کی جانب سے یہ خفیہ آپریشن دہشت گردوں کی مصدقہ موجودگی کی اطلاع پر کیا گیا۔

آپریشن کے بعد سیکیورٹی فورسز کی جانب سے مذکورہ علاقے میں سوئیپنگ بھی کی گئی۔