شمالی وزیرستان: میر علی میں سکیورٹی فورسز اور دہشتگردوں کے درمیان فائرنگ، دو دہشتگرد ہلاک

شمالی وزیرستان (ڈیلی اردو) پاکستان کے صوبہ خیبرپختونخوا کے ضلع شمالی وزیرستان کی تحصیل میر علی کے علاقے علی خیل میں سکیورٹی فورسز اور دہشتگردوں کے درمیان فائرنگ کے تبادلے میں دو دہشتگرد ہلاک ہوگئے۔

موصولہ اطلاعات کے مطابق علاقے میں سکیورٹی فورسز اور دہشتگردوں کا آمنا سامنا ہوا، جس کے بعد دونوں جانب سے فائرنگ کا تبادلہ ہوا۔ کارروائی کے دوران دو دہشتگرد مارے گئے۔

واقعے کے بعد علاقے میں سکیورٹی صورتحال کے پیش نظر نگرانی اور حفاظتی اقدامات مزید سخت کیے جانے کی اطلاعات ہیں۔ تاہم ہلاک ہونے والے دہشتگردوں کی شناخت، ان سے برآمد ہونے والے اسلحے یا کسی تنظیم سے ان کے تعلق کے بارے میں تاحال تفصیلات سامنے نہیں آئیں۔

شمالی وزیرستان طویل عرصے سے دہشتگردی کے خلاف سکیورٹی کارروائیوں کا اہم مرکز رہا ہے، جہاں سکیورٹی فورسز کی جانب سے دہشتگرد نیٹ ورکس کے خلاف کارروائیاں جاری ہیں۔