شمالی وزیرستان میں جھڑپ، 3 دہشت گرد اور 6 فوجی ہلاک

راولپنڈی (ڈیلی اردو/بی بی سی) صوبہ خیبر پختونخوا کے قبائلی ضلع شمالی وزیرستان کے علاقے دیردونی میں دہشت گردوں اور پاکستان کی فوج کے اہلکاروں میں فائرنگ کے تبادلے میں چھ فوجی اہلکار ہلاک ہو گئے ہیں۔

شمالی وزیرستان کے صدر مقام میرانشاہ میں دہشت گردوں کے حملے میں سیکورٹی فورسز کے حوالدار سلیم خان، نائیک جاوید، سپاہی بسمہ اللہ، سپاہی راجب علی، سپاہی بلال، اور سپاہی قدیر ہلاک ہوگئے۔ #NorthWaziristan #Pakistan

— Shabbir Hussain Turi (@ShabbirTuri) May 4, 2023

پاکستان کی فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا ہے کہ علاقے میں دہشتگروں کی ممکنہ موجودگی کی اطلاع پر آپریشن کیا گیا جس میں دہشت گردوں کے ساتھ فائرنگ کے تبادلے میں چھ اہلکار ہلاک جبکہ تین دہشت گرد مارے گئے اور دو زخمی ہوئے۔

بیان میں کہا گیا ہے کہ علاقے میں سرچ آپریشن جاری ہے۔

آئی ایس پی آر کے بیان کے مطابق ہلاک ہونے والے اہلکاروں میں ٹانک سے تعلق رکھنے والے حوالدار سلیم خان،کوہاٹ سے نائیک جاوید اقبال، بنوں کے سپاہی نذیر خان، مردان سے تعلق رکھنے والے سپاہی حضرت بلال، ضلع اورکزئی کے سپاہی سید رجب حسین اور ضلع خیبر سے تعلق رکھنے والے سپاہی بسم اللہ جان شامل ہیں۔

آئی ایس پی آر کی جانب سے بیان میں کہا گیا ہے کہ پاکستان کی سکیورٹی فورسز ملک سے دہشتگردی کے ناسور کو ختم کرنے کے لیے پرعزم ہیں۔