شمالی وزیرستان میں خدی کیمپ پر خودکش حملہ: 7 پاکستانی اہلکار ہلاک، 13 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع شمالی وزیرستان کی تحصیل میر علی میں سیکیورٹی فورسز کے خدی کیمپ (خدی قلعہ) پر خودکش حملے میں 7 اہلکار ہلاک اور 13 زخمی ہوگئے، جبکہ فورسز کی جوابی کارروائی میں 6 حملہ آور بھی مارے گئے۔

ذرائع کے مطابق ہلاک ہونے والوں میں رحیم باربر، نائیک کریم، سپاہی حسین، حوالدار نجیب، سپاہی ازیر اور سپاہی رفیق شامل ہیں۔

زخمیوں میں لانس نائیک فہد، شہروز باربر، عدیل، نائیک نسیم، سپاہی افضل بھٹی، سپاہی حافظ شاہد، سپاہی علی، رحمان، سپاہی زاہد اور امانی (کینٹین ٹھیکیدار) شامل ہیں۔

ان میں سپاہی جواد، سپاہی نیاز، مدثر اور سپاہی لال ضمیر کی حالت تشویشناک بتائی جا رہی ہے۔

اس حملے کی ذمہ داری "جیش فرسانِ محمد" نے قبول کی ہے، جو حافظ گل بہادر گروپ سے منسلک ایک عسکریت پسند تنظیم ہے۔

سرکاری ذرائع کے مطابق میر علی میں ایک خودکش بمبار نے بارود سے بھری گاڑی سیکیورٹی فورسز کے کیمپ کی دیوار سے ٹکرائی، جو زوردار دھماکے سے پھٹ گئی۔ دھماکے کے بعد دیگر حملہ آوروں نے کیمپ میں داخل ہونے کی کوشش کی، تاہم فورسز نے جوابی کارروائی کرتے ہوئے انہیں ہلاک کر دیا۔

ادھر قبائلی ضلع باجوڑ میں پاکستانی فورسز نے دہشت گردی کا ایک بڑا منصوبہ ناکام بناتے ہوئے بارودی مواد سے بھری گاڑی کو تباہ کر دیا۔