شمالی وزیرستان میں دو روزہ کرفیو نافذ، نقل و حرکت مکمل بند

پشاور(ڈیلی اردو) شمالی وزیرستان میں امن و امان کی صورتحال کے پیش نظر ضلعی انتظامیہ نے ہفتہ سے سوموار صبح تک مکمل کرفیو نافذ کرنے کا اعلان کر دیا ہے۔

ضلعی انتظامیہ کی جانب سے جاری نوٹیفکیشن کے مطابق 2 اگست بروز ہفتہ صبح 5 بجے سے 4 اگست بروز سوموار صبح 7 بجے تک ضلع بھر میں ہر قسم کی نقل و حرکت پر مکمل پابندی عائد ہوگی۔ تمام سڑکیں، گزرگاہیں اور آمد و رفت کے راستے بند رہیں گے، تاہم سیکیورٹی فورسز کی معمول کی گشت اور کارروائیاں جاری رہیں گی۔

انتظامیہ نے شہریوں سے اپیل کی ہے کہ وہ اس دوران گھروں تک محدود رہیں اور سیکیورٹی اداروں کے ساتھ مکمل تعاون کریں۔ واضح رہے کہ سورج غروب ہونے سے طلوع ہونے تک پہلے سے جاری شبانہ پابندی بھی تاحکمِ ثانی برقرار رہے گی۔

حکام کا کہنا ہے کہ یہ اقدام علاقے میں امن و استحکام کو یقینی بنانے کے لیے ضروری ہے۔