شمالی وزیرستان سے الفلاح بینک کے منیجر اور یو بی ایل کا ملازم اغوا

میرانشاہ (ڈیلی اردو )  پاکستان کے قبائلی ضلع شمالی وزیرستان کے علاقے ہرمز میں نامعلوم مسلح افراد نے الفلاح بینک کے منیجر جمیل انور شاہ اور یو بی ایل بینک کے ملازم حیات کو اغوا کر لیا ہے۔ ڈسٹرکٹ پولیس آفیسر (ڈی پی او) وقار خان نے واقعے کی تصدیق کرتے ہوئے بتایا کہ اغوا کار دونوں بینک ملازمین کے ساتھ فلائنگ کوچ کے ڈرائیور کو بھی اپنے ساتھ لے گئے۔

واقعے کے بعد علاقے میں شدید خوف و ہراس پھیل گیا ہے، جبکہ مغویوں کی خیریت کے حوالے سے مقامی آبادی میں سخت بے چینی پائی جا رہی ہے۔

علاقہ مکینوں نے اس واقعے پر شدید ردعمل کا اظہار کرتے ہوئے آج احتجاج کا اعلان کیا ہے۔ ان کا مطالبہ ہے کہ انتظامیہ اور قانون نافذ کرنے والے ادارے فوری طور پر مغویوں کی بازیابی کے لیے مؤثر اقدامات اٹھائیں، بصورت دیگر احتجاج کو وسعت دی جائے گی۔