عباس عراقچی نے امریکہ کیلئے ایران کے تحریری پیغامات پاکستانی حکام کے حوالے کر دیے

تہران (ڈیلی اردو ) ایرانی میڈیا (فارس نیوز ایجنسی) کے مطابق وزیر خارجہ عباس عراقچی نے پاکستان میں اعلیٰ حکام کو امریکہ کے لیے ایران کے تحریری پیغامات حوالے کیے ہیں۔

رپورٹ کے مطابق یہ پیغامات ایران کے جوہری پروگرام کی “ریڈ لائنز” اور آبنائے ہرمز سے متعلق ہیں، جنہیں ایران نے ایک سفارتی اقدام کے طور پر پیش کیا ہے۔ ایرانی میڈیا کا کہنا ہے کہ اس اقدام کا براہِ راست تعلق کسی مذاکراتی عمل سے نہیں بلکہ خطے کی صورتحال اور ایران کے مؤقف کی وضاحت سے ہے۔

عباس عراقچی نے اسلام آباد میں آرمی چیف فیلڈ مارشل عاصم منیر سے بھی ملاقات کی تھی، جس کے بعد وہ اپنے دورے کے اگلے مرحلے میں روس روانہ ہو گئے ہیں۔

اطلاعات کے مطابق وہ ماسکو میں روسی صدر ولادیمیر پوتن سے ملاقات کریں گے، جہاں دوطرفہ تعلقات اور علاقائی صورتحال پر بات چیت متوقع ہے۔

اس سے قبل ایرانی وزیر خارجہ نے عمان کے دورے کے دوران بھی اعلیٰ حکام سے ملاقاتیں کیں اور خلیج فارس میں “نئے علاقائی نظام” کے قیام کی ضرورت پر زور دیا۔