عراق : سیکیورٹی فورسز کی کارروائیاں، داعش کے 3 دہشتگرد گرفتار، اسلحہ و گولہ بارود برآمد

بغداد(ڈیلی اردو) عراق کے صوبوں دیالہ اور الانبار میں سیکیورٹی اداروں نے خفیہ اطلاعات کی بنیاد پر مختلف کارروائیاں کرتے ہوئے داعش سے وابستہ 3 دہشتگردوں کو گرفتار کرلیا، جبکہ تنظیم کے زیر استعمال اسلحہ اور گولہ بارود کا ذخیرہ بھی برآمد کرلیا گیا۔

عراقی فوج کے محکمہ انٹیلیجنس کے مطابق دیالہ میں موصول ہونے والی اہم خفیہ معلومات اور مسلسل نگرانی کے بعد سیکیورٹی اہلکاروں نے کارروائی کرتے ہوئے داعش سے تعلق رکھنے والے 2 دہشتگردوں کو گرفتار کیا۔ دونوں افراد کے خلاف پہلے ہی انسداد دہشتگردی قوانین کے تحت گرفتاری کے وارنٹ جاری تھے۔

حکام کے مطابق گرفتار دہشتگردوں کو مزید قانونی کارروائی کے لیے متعلقہ اداروں کے حوالے کردیا گیا ہے۔

دوسری جانب عراقی انسداد دہشتگردی فورس نے صوبہ الانبار میں انٹیلیجنس معلومات کی بنیاد پر کارروائی کرتے ہوئے داعش کے ایک اور دہشتگرد کو گرفتار کرلیا۔

الانبار ہی میں سیکیورٹی فورسز نے ایک الگ تلاشی کارروائی کے دوران داعش کے چھوڑے ہوئے اسلحہ اور گولہ بارود کا ذخیرہ بھی برآمد کیا، جسے سیکیورٹی اہلکاروں نے اپنی تحویل میں لے کر محفوظ طریقے سے ناکارہ بنا دیا۔