غزہ پر اسرائیلی بمباری اور فائرنگ، 22 بچوں سمیت 41 فلسطینی زخمی

غزہ (ڈیلی اردو) اسرائیلی نے غزہ سے ملحقہ سرحدوں پر جھڑپوں کے بعد ایک بار پھر غزہ شہر میں بمباری کی ہے۔

عرب میڈیا کے مطابق گزشتہ روز غزہ کی پٹی پر مزاحمتی تحریک حماس اور فلسطینیوں کی بڑی تعداد جمع ہوئی اور اسرائیلی فورسز کے خلاف مظاہرہ کیا گیا جس پر اسرائیلی بارڈر فورسز نے مظاہرین کو منتشر کرنے کے لیے فائرنگ کی جس کے نتیجے میں 42 فلسطینی زخمی ہوئے جن میں 22 بچے شامل ہیں۔ دو زخمی کی حالت تشویش ناک بتائی جا رہی ہے۔ اس سے قبل حماس کی جانب سے جمعے کے روز مظاہروں کا اعلان کیا گیا تھا۔ مظاہرین اسرائیلی دفاعی افواج کے مطابق قریب 100 فلسطینیوں نے سرحدی باڑ کی جانب بڑھنے کی کوشش کی اور فوجیوں کی جانب دھماکا خیز مواد پھینکا، جس کے بعد جوابی کارروائی کی گئی۔

دوسری جانب اسرائیلی فورسز کے مطابق مظاہرین نے بارڈر فورسز پر فائر بم پھینکے، ٹائر جلائے اور پتھر پھینکے جس کے نتیجے میں ایک اسرائیلی فوجی شدید زخمی ہوگیا، واقعہ کے بعد مظاہرین پر فائرنگ کی گئی جب کہ آج صبح غزہ میں حماس کے ٹھکانوں پر بمباری کی گئی۔

حالیہ تشدد کے واقعات غزہ کے لیے قطری امداد کی بحالی کے اسرائیلی اعلان کے بعد سامنے آئے ہیں۔