غیر ملکی خفیہ نیٹ ورکس سے منسلک 735 گرفتار، ایرانی سکیورٹی اداروں کا دعویٰ

تہران (ڈیلی اردو/تسنیم نیوز) ایرانی سکیورٹی اداروں نے جمعے کو اعلان کیا کہ ملک میں کام کرنے والے غیر ملکی خفیہ نیٹ ورکس کو ناکام بناتے ہوئے 735 افراد کو گرفتار یا طلب کر لیا گیا ہے۔  

ایرانی خبر رساں ایجنسی تسنیم کے مطابق پاسداران انقلاب (آئی آر جی سی) کی انٹیلی جنس شاخ نے امریکہ اور اسرائیل پر الزام لگایا کہ وہ ایران کی جغرافیائی سالمیت کو تقسیم کرنے کا منصوبہ بنا رہے تھے۔ بیان کے مطابق دونوں ممالک نے ایران کے اندر ایک کمانڈ روم قائم کر رکھا تھا۔

تاہم مذکورہ سازش کے کوئی ثبوت پیش نہیں کیے گئے۔  

دوسری جانب امریکی صدر ڈونلڈ ٹرمپ نے جمعرات کو کہا تھا کہ ایک ’’بہت بڑا بیڑا‘‘ مشرق وسطیٰ کے اس ملک کے قریب پانیوں کی طرف روانہ ہے۔ چند روز قبل امریکی میڈیا نے ایران کے قریب طیارہ بردار بحری جہاز یو ایس ایس ابراہم لنکن اور اس کے ساتھ جانے والے جہازوں کی تعیناتی کی اطلاع بھی دی تھی۔ 

تاہم آئی آر جی سی کے کمانڈر میجر جنرل محمد پاکپور نے کسی بھی حملے سے خبردار کرتے ہوئے کہا ہے کہ ایرانی مسلح افواج کی انگلی ’’ٹرگر‘‘ پر ہے۔  

گزشتہ موسم گرما میں اسرائیل اور امریکہ نے فضائی حملوں میں ایران کے بڑے حصوں میں جوہری تنصیبات، فوجی اور شہری اہداف کو نشانہ بنایا تھا۔ اس کے بعد سے نئی فوجی کشیدگی کے بارے میں مسلسل قیاس آرائیاں جاری ہیں۔