قرآن پاک کی بے حرمتی: مختلف شہروں میں‌احتجاج اور ہنگامے، متعدد افراد زخمی

اسٹاک ہوم (ڈیلی اردو) سوئیڈن میں قرآن پاک کی بے حرمتی کے بعد مختلف شہروں میں احتجاج اور ہنگاموں میں متعدد افراد زخمی ہوگئے۔

غیرملکی میڈیا کے مطابق سوئیڈن میں انتہا پسند تنظیم کی جانب سے قرآن پاک کے نسخے جلائے جانے کے بعد مختلف شہروں میں ہنگامے اور احتجاج کا سلسلہ جاری ہے۔

دائیں بازو کی مسلمان دشمن تنظیم نے سوئیڈن میں ایک مہم کا آغاز کیا ہے جس میں قرآن پاک کے نسخے جلائے جارہے ہیں۔ اس گھناؤنی مہم کیخلاف سوئیڈن کے مختلف شہروں میں مسلمان سراپا احتجاج ہیں۔

قرآن پاک کی بے حرمتی کے خلاف گزشتہ 4 روز سے جاری احتجاج کے دوران پولیس اورمظاہرین میں جھڑپوں میں متعدد افراد زخمی ہوگئے۔ ہنگاموں کے دوران بسوں سمیت بہت سی گاڑیوں کو آگ لگا دی گئی۔ پولیس نے 30 سے زائد مظاہرین کو گرفتارکرلیا۔

قرآن پاک کی بے حرمتی کے خلاف ایران اورعراق نے سوئیڈن کے سفیر کو طلب کرکے شدید احتجاج کیا جبکہ سعودی عرب نے اس مکروہ واقعہ کی مذمت کی ہے۔