قطر نے 3 ایرانی پائلٹ کو حراست میں رکھاہے، ایران کا دعویٰ

تہران (ڈیلی اردو) ایران نے دعویٰ کیا ہے کہ اس کے تین جنگی پائلٹ قطر کی تحویل میں ہیں اور تہران نے ان کی موجودہ صورتحال معلوم کرنے کے لیے عالمی ادارہ ریڈ کراس سے مدد طلب کرلی ہے۔

ایرانی مسلح افواج کے جنرل اسٹاف میں لاپتا افراد کی تلاش سے متعلق کمیٹی کے سربراہ بریگیڈیئر جنرل محمد باقر زادہ نے عالمی ریڈ کراس کمیٹی کی صدر ماریانا سپولیئرک کو خط لکھ کر تین ایرانی پائلٹوں کے بارے میں معلومات فراہم کرنے کی درخواست کی ہے۔

ایرانی میڈیا کے مطابق باقر زادہ کا کہنا ہے کہ 2 مارچ 2026 کو دو ایس یو-24 جنگی طیارے قطر میں موجود ایک امریکی فوجی اڈے کو نشانہ بنانے کے مشن پر روانہ ہوئے تھے۔ ان کے مطابق واپسی کے دوران طیاروں کو نشانہ بنایا گیا، جس کے نتیجے میں چار ایرانی پائلٹ متاثر ہوئے۔

ایرانی حکام کے مطابق ان میں سے ماجد کاظمی کی لاش ایران منتقل کی گئی اور انہیں شیراز میں سپرد خاک کیا گیا، جبکہ جواد صالحی، عبدالمجید دشتیان اور عمران بہروشیان کے بارے میں تہران کا مؤقف ہے کہ انہیں قطری فورسز نے زندہ گرفتار کرلیا تھا۔

ایرانی حکام اس سے قبل بھی تینوں پائلٹوں کے بارے میں معلومات حاصل کرنے کی کوششوں کا ذکر کرچکے ہیں، تاہم ان کی موجودہ حالت اور مقام سے متعلق کوئی حتمی معلومات سامنے نہیں آئی ہیں۔

بریگیڈیئر جنرل باقر زادہ نے الزام عائد کیا کہ کئی ماہ گزرنے کے باوجود قطری حکام نے مبینہ طور پر پائلٹوں کے بنیادی حقوق سے متعلق معلومات فراہم نہیں کیں اور اہل خانہ کو ملاقات کی اجازت بھی نہیں دی گئی۔

ایرانی حکام نے اس معاملے کو جنگی قیدیوں کے حقوق سے متعلق بین الاقوامی قوانین اور جنیوا کنونشنز کی خلاف ورزی قرار دیتے ہوئے عالمی ریڈ کراس سے معاملے میں کردار ادا کرنے کی اپیل کی ہے۔

ایرانی فوج پہلے دعویٰ کرچکی ہے کہ ان پائلٹوں نے قطر میں موجود امریکی فوجی اڈے کو نشانہ بنا کر اسے بھاری نقصان پہنچایا تھا، تاہم واپسی کے دوران ان کے طیاروں کو کارروائی کا سامنا کرنا پڑا۔ قطر کی جانب سے ان دعوؤں پر کوئی مؤقف اس خبر میں شامل نہیں کیا گیا۔