قلات میں سیکورٹی فورسز کا آپریشن، بلوچ لبریشن آرمی کے 4 دہشت گرد ہلاک

راولپنڈی (ک م) پاکستانی سیکیورٹی فورسز نے بلوچستان کے ضلع قلات میں انٹیلیجنس اطلاعات کی بنیاد پر آپریشن کیا، جس کے دوران کالعدم بلوچ لبریشن آرمی سے تعلق رکھنے والے مزید 4 دہشت گرد مارے گئے۔

ڈیلی اردو کے مطابق پاک فوج کے شعبہ تعلقات عامہ (آئی ایس پی آر) نے بتایا کہ 19 جولائی 2025 کو شروع ہونے والے آپریشن میں 4 دہشت گرد ہلاک کیے گئے تھے، جبکہ 21 جولائی کو علاقے میں کلیئرنس کے دوران مزید 4 دہشت گرد مارے گئے۔

آئی ایس پی آر کا کہنا ہے کہ کارروائی کے دوران دہشت گردوں کا ایک خفیہ ٹھکانہ بھی تباہ کیا گیا، جہاں سے بڑی مقدار میں جدید اسلحہ، گولہ بارود اور دھماکا خیز مواد برآمد ہوا۔

فوج کے ترجمان کے مطابق، سیکیورٹی فورسز نے بھارتی سرپرستی میں کام کرنے والے دہشت گرد گروہوں کی بزدلانہ کارروائیوں کو ناکام بنا کر ایک بار پھر واضح کر دیا ہے کہ پاکستان کی سرزمین پر دہشت گردی کی کوئی گنجائش نہیں۔

واضح رہے کہ اس سے قبل 20 جولائی کو بھی قلات میں اسی تنظیم سے وابستہ چار دہشت گرد مارے گئے تھے۔ یہ کارروائیاں 19 اور 20 جولائی کی درمیانی شب بھارتی حمایت یافتہ دہشت گردوں کی موجودگی کی اطلاعات پر کی گئیں، جن کے دوران فورسز نے دہشت گردوں کے ٹھکانے کو مؤثر انداز میں نشانہ بنایا۔