لارک جزیرے پر امریکہ کا حملہ ، ایران کا اردن و قطر میں امریکی اہداف پر حملہ

تہران/واشنگٹن(ڈیلی اردو) ایران کے لارک جزیرے پر امریکی فورسز کی کارروائی کے بعد خطے میں کشیدگی مزید بڑھ گئی۔ امریکی سینٹرل کمانڈ کے مطابق کارروائی میں پاسدارانِ انقلاب کے دو راکٹ لانچرز کو نشانہ بنایا گیا۔

امریکی حکام کے مطابق ایرانی اہلکار آبنائے ہرمز میں بحری بارودی سرنگیں پہنچانے کے لیے راکٹ فائر کرنے کی تیاری کررہے تھے، اسی دوران امریکی فورسز نے کارروائی کی۔ ایرانی ذرائع نے حملے میں 2 افراد کے ہلاک اور 2 کے زخمی ہونے کا دعویٰ کیا ہے۔

لارک جزیرہ آبنائے ہرمز میں بندر عباس کے قریب واقع ہے، جو عالمی بحری تجارت اور تیل کی ترسیل کے حوالے سے انتہائی اہم سمندری راستہ ہے۔

ایران کا امریکی حملے کا جواب، اردن اور قطر میں امریکی اہداف کو نشانہ بنانے کا دعویٰ

لارک جزیرے پر امریکی حملے کے چند گھنٹوں بعد ایران نے جوابی کارروائی کرتے ہوئے خطے میں موجود امریکی اہداف پر میزائل حملے کرنے کا دعویٰ کیا ہے۔

ایرانی میڈیا کے مطابق مختلف مقامات سے میزائل داغے گئے، جن میں اردن میں کنگ حسین اور الازرق ایئربیسز کو نشانہ بنانے کا بھی دعویٰ کیا گیا۔ پاسدارانِ انقلاب نے دونوں اڈوں پر اہم تنصیبات کو نقصان پہنچانے کا دعویٰ کیا ہے۔

دوسری جانب اردن کی فوج نے کہا ہے کہ اس کے فضائی دفاعی نظام نے اردن کی فضائی حدود میں داخل ہونے والے 8 میزائلوں کو روک لیا۔ امریکی حکام کے مطابق اردن میں امریکی فورسز کو نشانہ بنایا گیا تاہم کسی بڑے نقصان کی اطلاع نہیں ملی، جبکہ قطر میں امریکی العدید ایئربیس کے قریب دھماکوں کی اطلاعات بھی سامنے آئیں۔