لبنان :اسد حکومت کی فوج کے میجر جنرل عادل عیسیٰ کو شام کے حوالے کرنے کا فیصلہ

بیروت(ڈیلی اردو) لبنان کے امتیازی پبلک پراسیکیوٹر احمد رامی الحاج نے شام کی سابق حکومت سے وابستہ شامی فوج کے میجر جنرل عادل عیسیٰ کو شامی حکام کے حوالے کرنے کا حکم دے دیا۔

لبنانی حکام کے مطابق عادل عیسیٰ لبنان میں زیر حراست تھے اور ان کے خلاف شام میں مبینہ جرائم کے مقدمات کا سامنا ہے۔ لبنانی عدلیہ نے معاملے کا جائزہ لینے کے بعد قرار دیا کہ حوالگی کے لیے درکار قانونی اور عدالتی تقاضے پورے ہوچکے ہیں۔

حوالگی کا فیصلہ لبنان اور شام کے درمیان 1951ء میں طے پانے والے عدالتی معاہدے کی بنیاد پر کیا گیا۔

لبنانی پراسیکیوٹر نے مرکزی فوجداری تفتیشی شعبے کو بھی ہدایت جاری کی کہ زیر حراست عادل عیسیٰ کو بیروت کے قصرِ عدل کی حراست سے جنرل سیکیورٹی کے حوالے کیا جائے تاکہ انہیں لبنان اور شام کی مشترکہ سرحد تک منتقل کرکے شامی حکام کے حوالے کرنے کی کارروائی مکمل کی جاسکے۔

رپورٹ کے مطابق عادل عیسیٰ کو بعد ازاں سرحد پر موجود شامی سیکیورٹی حکام کے حوالے کردیا گیا۔