لبنان میں اسرائیلی فوج کی پیش قدمی، فضائی و زمینی حملے شدت اختیار کر گئے

یروشلم/بیروت (ڈیلی اردو/اے پی/اے ایف پی/روئٹرز/این این اے) اسرائیل نے ہفتے کے روز جنوبی لبنان میں ایک درجن سے زائد مقامات سے لوگوں کو نکل جانے کا حکم دینے بعد وہاں فضائی اور زمینی حملے شروع کر دیے۔ 

اسرائیلی وزیر اعظم نے اعلان کیا ہے کہ ان کی افواج لبنانی علاقے میں مزید اندر تک پیش قدمی کر چکی ہیں۔

لبنانی فوج کے مطابق، ایک اسرائیلی حملے میں اس کے دو فوجی زخمی ہوئے۔  یہ واقعہ ایسے وقت میں پیش آیا جب ایک روز قبل ہی لبنان اور اسرائیل کے فوجی وفود نے واشنگٹن میں سکیورٹی امور کے بارے میں اہم بات چیت کی تھی۔

امریکی دارالحکومت میں ہونے والے یہ مذاکرات آئندہ ہفتے امریکہ کی ثالثی میں متوقع مذاکرات سے قبل کیے گئے، جو اسرائیل  اور حزب اللہ کے درمیان حالیہ تنازع کے بعد چوتھا دور ہوں گے۔

لبنان کی سرکاری خبر رساں ایجنسی (این این اے) کے مطابق جنوبی علاقوں میں اسرائیل کی جانب سے متعدد حملے کیے گئے، جن میں تاریخی بیفورٹ قلعے کے قریب گولہ باری بھی شامل ہے۔

لبنان کے وزیر ثقافت غسان سلامة نے خبردار کیا ہے کہ یہ حملے ملک کے تاریخی  اور ثقافتی ورثے کے لیے سنگین خطرہ بن چکے ہیں۔

دوسری جانب، لبنانی صدر جوزف عون اور وزیر اعظم نواف سلام نے دو اور تین جون کو ہونے والے  آئندہ مذاکرات سے قبل اسرائیلی کارروائیوں کے خلاف بین الاقوامی سطح پر روابط تیز کرنے پر اتفاق  کیا ہے۔ دونوں رہنماؤں نے جنوبی لبنان کے شہروں، خصوصاً صور اور نباتیہ میں مسلسل بمباری، گھروں کی مسماری اور تاریخی مقامات کی تباہی پر شدید تشویش کا اظہار کیا۔

دریں اثناء  لبنان  کی فوج نے ہفتے کے روز بتایا کہ اس کے دو فوجی جنوبی شہر نباتیہ کے قریب ایک گاڑی میں اسرائیلی ڈرون حملے کے نتیجے میں شدید زخمی ہو گئے۔

اسرائیل اور ایران کی حمایت یافتہ حزب اللہ کے درمیان لڑائی روکنے کے لیے 17 اپریل  کو جنگ بندی نافذ ہوئی تھی، لیکن اس پر عملی طور پر مکمل عملدرآمد نہیں ہو سکا۔ 

ایران کا مؤقف ہے کہ مشرقِ وسطیٰ میں فروری میں شروع ہونے والے  وسیع تنازع کے خاتمے کے لیے امریکہ کے ساتھ ہونے والے کسی بھی معاہدے میں لبنان کو شامل کرنا ضروری ہے۔