لبنان میں گاڑی پر اسرائیلی ڈرون حملہ، چار افراد ہلاک

بیروت (ڈیلی اردو) جنوبی لبنان کے شہر نبطیہ میں پیر کے روز ایک گاڑی پر ہونے والے اسرائیلی ڈرون حملے میں چار افراد ہلاک ہو گئے۔

لبنان کی سرکاری خبر رساں ایجنسی کے مطابق ’سکول کی پرنسپل، ان کی والدہ، ایک غیر ملکی گھریلو خاتون ملازمہ اور ایک مرد شامی کارکن‘ ایک کار میں نبطیہ فوقا کے علاقے میں اپنے گھر سے واپس آرہے تھے کہ ’اسرائیلی ڈرون‘ نے انھیں نشانہ بنایا۔

لبنان کی سرکاری خبر رساں ایجنسی کے مطابق اسے حالیہ ہفتوں میں ہونے والا سب سے مہلک حملہ قرار دیا جا رہا ہے۔

لبنانی سکیورٹی ذرائع کا کہنا ہے کہ گزشتہ چند ہفتوں کے دوران اس نوعیت کے حملوں میں کمی آئی تھی، تاہم نبطیہ کا یہ واقعہ جانی نقصان کے لحاظ سے سب سے بڑا حملہ ہے۔ دوسری جانب اسرائیل نے کہا ہے کہ وہ ان رپورٹس کی تحقیقات کر رہا ہے۔

رپورٹس کے مطابق  اسرائیل اور حزب اللہ کے درمیان جنگ کے دوران اسرائیل نے جنوبی لبنان کے ایک حصے پر قبضہ کر رکھا ہے۔ یہ کشیدگی 2 مارچ کو اس وقت شروع ہوئی جب ایران کی حمایت یافتہ حزب اللہ نے، ایران پر امریکی اور اسرائیلی حملوں کے بعد، اسرائیل پر فائرنگ کی۔

گزشتہ ماہ لڑائی کی شدت میں کمی دیکھی گئی۔ مبصرین کے مطابق ایران نے امریکہ کے ساتھ مذاکرات میں لبنان میں جنگ بندی کے مطالبے پر زور دیا،  جبکہ اسرائیل نے بھی واشنگٹن کی درخواست پر لبنان میں اپنے  حملوں میں کمی کی۔

امریکہ اور ایران کے درمیان گزشتہ ماہ طے پانے والے ایک عبوری معاہدے میں دونوں  ممالک اور ان کے اتحادیوں سے لبنان سمیت تمام محاذوں پر فوجی کارروائیاں روکنے کا مطالبہ کیا گیا ہے۔ تاہم نبطیہ میں حالیہ حملے نے اس معاہدے کے مستقبل اور خطے میں امن کی کوششوں پر نئے سوالات کھڑے کر دیے ہیں۔