لوئر دیر: دہشتگردوں کیخلاف ٹارگٹڈ آپریشن کا اعلان، عوام کو نقل مکانی نہیں کرنا پڑے گی

پشاور (ڈیلی اردو) خیبر پختونخوا کے ضلع  دیر لوئر کے سابق اراکین پارلیمان، مقامی مشران اور عمائدین پر مشتمل گرینڈ جرگہ نے پشاور میں چیف سیکرٹری خیبرپختونخوا شہاب علی شاہ سے ملاقات کی، جس میں علاقے کے امن و امان، عوامی تحفظ اور موجودہ مسائل پر تفصیلی گفتگو کی گئی۔

ملاقات کے دوران جرگہ اراکین نے اپنے تحفظات اور مشکلات چیف سیکرٹری کے سامنے رکھیں، جس پر انہوں نے یقین دہانی کرائی کہ دہشتگردوں کے خلاف سخت اور مؤثر ٹارگٹڈ آپریشن کیا جائے گا۔ انہوں نے واضح کیا کہ یہ کوئی ایسا فوجی آپریشن نہیں ہوگا جس میں عوام کو اپنے گھروں سے نقل مکانی کرنا پڑے، بلکہ کارروائیاں صرف دہشتگردوں کے خلاف کی جائیں گی تاکہ عام شہری متاثر نہ ہوں۔

چیف سیکرٹری نے کہا کہ صوبے میں امن و امان کی صورتحال برقرار رکھنے کے لیے ہر ممکن اقدامات کیے جائیں گے اور حکومتی رٹ قائم رکھی جائے گی۔ انہوں نے اس عزم کا اظہار کیا کہ دہشتگردوں کو دوبارہ سر اُٹھانے نہیں دیا جائے گا، اور یہ آپریشن اس انداز میں کیا جائے گا کہ علاقے میں امن، سکون اور استحکام قائم رہے۔